Muyedinovnıñ qayd etkenine köre, etaptan soñ hadimler «sebepsiz» küç qulandı. O, ariza berdi, daa on mabüs onı imzaladı. Apishane memuriyeti teşkerüv keçire. Onıñ bildirgenine köre, nezaretçiler oña maneviy ceetten de basqı yaptı.
Yaşar Muyedinov bulunğan kamera pek dımlı edi, dep bildirdi. Sağlığı fenalaştı – sağ qolu daa çoq ağırıp başladı.
«Anda [apishanege] kelmezden evel de ağrı bar edi. Amma kamera dımlı olğanı içün daa çoq ağıra, dep ayta. Cerrah adına ariza berdi, çünki qolunda bir şişlik bar, amma eki aydan berli kimse kelmey. Tişlernen bağlı şikâyetleri bar. Tiş ekimine muracaat etti, dep ayta», – dep tarif etti Naile İbragimova.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
2022 senesi noyabrniñ 24-nde Rostov-na-Donudaki Cenübiy arbiy okrugınıñ mahkemesi mabüslerni terror faaliyetinde ve akimiyet zapt etmege tırışqanlarında qabaatladı. Faaller Enver Ametov ve Yaşar Muyedinov 13 yıl sert rejimli koloniyada, vatandaş jurnalistleri Ruslan Suleymanov, Rustem Şeyhaliyev ve Osman Arifmemetov 14 yıl koloniyada qalmasına üküm etildi. Mabüsler 4 yılnı apishanede keçirecek, soñra daa 1 yılğa areket serbestligi sıñırlanacaq. Mabüsler özüni qabaatlı olaraq tanımayıp, siyasiy taqip olğanını tüşüneler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
