Link açıqlığı

Saatnıñ esas haberi

Vitaliy Portnikov: Suv meselesi ve Qırım "akimiyeti"


Körgezmeli süret
Körgezmeli süret

Mahsus Qırım.Aqiqat içün

Mihail Bulgakov, moskovalılarnı bozğan kvartira meselesi aqqında ölmeycek aforizminiñ müellifi oldı. Oña oşatıp, "suv meselesi" de ilhaq etilgen Qırımnıñ başlıqlarını ve olarnıñ Moskovadaki şorbacılarını raat qaldırmay demek mümkün.

Suvnın kerek-kerekmez yerde hatırlaylar, em de hatırlasalar, belli bir şekilde yapalar - suv bizge, elbette ki, kerekmey, amma Ukraina borclu. Tamam şu birisiniñ kvartirası aqqında ikâye kibi - sanki bizim de degil, amma saiplerini biraz sıqıştırsaq da olur.

Kremlniñ yañı bolşevikleri, Qırım ilhaqı aqqında qarar bergende, bunıñ neticesi yarımadanıñ Ukrainanen iqtisadiy alâqalarınıñ üzülmesi olur, dep tüşünmedi, ğaliba

Em bolşevist Moskovadaki kvartira meselesi, em de Qırımdaki suv meselesiniñ tamırları ve müellifleri birdir, menimce. Olar, öz areketleriniñ aqibetlerini körip olamağan adamlarnıñ siyasetidir.

Bolşevikler, akimiyetni öz eline alğan soñ, şahsiy mülkiyetni lâğu etti ve iqtisadiyatnıyoq etti - neticede sade kvartira, daa ziyadesi - Moskova merkezinde olğan kvartira, maldan yeñişke çevirildi.

Kremlniñ yañı bolşevikleri, Qırım ilhaqı aqqında qarar bergende, bunıñ neticesi yarımadanıñ Ukrainanen iqtisadiy alâqalarınıñ üzülmesi olur, dep tüşünmedi, ğaliba. Qırımnı RSFSRden USSR-ge berilmesi aqqında SSSRniñ Yuqarı Şurasınıñ fermanınen qurulğan alâqalarnıñ degil de, coğrafiya alâqalarını. İste, bilmeyim daa qaç kere tekrarlamaq kerek, amma Qırım - bu ada degil, bu yarımadadır.

Rusiye akimiyetiniñ iç bir qararı Qırımdan ada yapmaz, amma yalıñız iqtisadiyatnıñ degil, qırımlılarnıñ yaşayışınıñ da degradatsiyasına sebep ola bile

Ve "suv meselesi" tamam bunen bağlıdır. Rusiye akimiyetiniñ iç bir qararı Qırımdan ada yapmaz, amma yalıñız iqtisadiyatnıñ degil, qırımlılarnıñ yaşayışınıñ da degradatsiyasına sebep ola bile. Qırım işğaliniñ er yañı künü köstere ki, sadece közlerni açmaq kerek, aqibetlerni köz ögüne almaq kerek. Şimaliy Qırım kanalından suv teminatınıñ toqtatılması da olarnıñ arasındadır.

Qırımda Ukraina prezidenti vekili Anton Korineviç, suv teminatı - Özü (Dnipro) özeni aqqan memleketniñ ve Qırım Muhtar Cumhuriyeti memuriy ceetten ait olğan devletniñ elindedir, dep ilhaq etilgen Qırımnıñ "başlıqları"na hatırlatqanı pek doğrudır. Qırım kanalınıñ özü de Ukraina topraqlarındadır, Rusiyeniñ degil ve qanun boyunca ne bu devletniñ, ne de işğalci akimiyetniñ bu kanalğa iç bir alâqası yoq.

Ve suv teminatı meselesini, eminim ki, yarımadanı işğalden qurtaruv meselelerinde ayrı baqmaq olmaz. İleride ise, Qırım kanalını ğayrıdan çalıştırmaq içün masraf etilecek paralarnı, Ukrainanıñ topraqlarını işğalden qurtarğanda, Rusiyeden reparatsiya olaraq istemek mümkün, dep tüşünem. Bu, menimce, Ukraina içün de, Rusiye içün de em Qırımnıñ özü içün mantıqlı bir mesele çezüvi olur.

«Fikir» rubrikasında bildirilgen fikirler, muelliflerniñ öz fikirlerini ifade ete ve muarririyetniñ noqtai-nazarını er vaqıt aks etmezler

XS
SM
MD
LG