Ukrayina Silâlı quvetleriniñ Baş ştabı iyülniñ 26-nda gece Qırımdaki "Saq" Rusiye arbiy uçaq alanına ücüm etilgenini tasdıqladı. Bu aqta haber Ukrayina komandanlığınıñ içtimaiy ağlarında derc etildi.
"Bugün gece Ukrayina Silâlı quvetleriniñ raketa ordularınıñ bölükleri mudafaa quvetleriniñ diger qısımlarınen beraberlikte vaqtınca işğal etilgen Qırımdaki "Saq" uçaq alanına ücüm ettiler", — dep bildirdi ukrauin arbiyleri.
Ukrayina Silâlı quvetleriniñ Baş ştabında qayd ettiler ki, uçaq alanını zemaneviy Rusiye ava mudafaası vastaları qorçalay edi, olar "Rusiyeniñ müim arbiy obyektini daa bir kere qorçalap olamadı". Al-azırda Ukrayina arbiyleri zararlanğanlar aqqında malümatnı tafsilâtlıca ögrenmege tırışa.
Rusiye arbiyleri ve Qırım akimiyeti bu haberlerni alâ daa izaatlamadı.
26 iyül gecesi Qırımnıñ ğarbındaki Novofedorovka köyündeki "Saq" rusiye arbiy uçaq alanına yapılğan ücüm neticesinde cebe silâsı yoq etildi, eki rus askeri yaralandı. Bu aqta "ASTRA" telegram kanalı Rusiye Federatsiyası tarafından işğal etilgen Qırımnıñ acele yardım hızmetlerindeki menbalarğa atıf etip haber etti.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
