Ukrainanıñ PACE eyyeti Rusiye eyyetini vekâletlerden marum etüv meselelerinden ğayrı, PACE sessiyasınıñ işinde iştirakini toqtatmağa qarar aldı, dep bildirdi iyünniñ 25-nde Ukrainanıñ PACE eyyeti yolbaşçısı Volodımır Aryev.
Onıñ qayd etkenine köre, eyyet Yuqarı Radadan ileride Ukrainanıñ iştirakini toqtatuv meselesini acele baqmasını, Ukraina prezidenti Volodımır Zelenskıy ve Ukraina Tış işler nazirliginden «Ukrainanıñ Avropa Şurası organlarında ilerideki iştirakinen bağlı qararnı acele qabul etmesini» rica etip muracaatta buluna.
Ukraina prezidenti Volodımır Zelenskıy Avropa Şurası Parlament assambleyasınıñ Rusiyeden esir tutulğan ukrainalı deñizcilerni qaytarmasını nasıl talap etecegini «körmege istey», dep bildirdi. Bu aqta o, iyünniñ 25-nde PACEniñ Rusiyeniñ rey aqqını ğayrıdan tiklemek qararını izaatlap ayttı.
Ukrainanıñ beşinci prezidenti Petro Poroşenko Rusiye eyyetini qaytarmağa imkân berecek PACE qararı «Ukraina içün ciddiy bir işaret ola», dep bildirdi.
Ukraina baş naziri Volodımır Ğroysman Avropa Şurası Parlament assambleyasınıñ sanktsiyalarnı kirsetüv, hususan Rusiyege qarşı, tertibini qıyınlaştırğan qararını «istilâcınıñ intiqamı» dep adlandırdı.
Qırımtatar Milliy Meclisiniñ reisi Refat Çubarov PACEniñ Rusiye qararı sebebinden Mustaqillik Meydanında umummilliy toplaşuv keçirmege çağıra.
Avropa Şurası Parlament assambleyası iyünniñ 25-ne keçer gecesi keçirilgen toplaşuvında PACE qaidelerini deñiştirgen ve sanktsiyalarnı qullanuv tertibini, hususan Rusiyege qarşı, qıyınlaştırğan qararğa qoltuttı. Buña 118 PACE azası rey berdi, 62-si qarşı çıqtı, 10-u bitaraf qaldı.
Rusiye eyyeti Assambleya sessiyalarında 2015 senesi yanvar ayından itibaren, eyyetniñ vekâletleri ciddiy şekilde sıñırlanğan soñ, iştirak etmey.
Ukraina aq qorçalayıcılarınıñ fikirince, Rusiye eyyeti Avropa Şurası Parlament assambleyasına qaytsa, Rusiyeniñ teşkilât talaplarına riayet etmegen taqdirde bu devletlerara teşkilâtnıñ «ahlâqiy teslimiyeti» olacaq. Bu aqta aq qorçalayıcı teşkilâtlarınıñ PACE tertip, immunitet ve qurulış işleri komitetine, Avropa Şurası iştirakçi memleketleriniñ milliy eyyetlerine yapqan açıq muracaatında aytıla.
Muracaatqa 12 ukrain aq qorçalayıcı teşkilâtı, şu cümleden «Vatandaş serbestligi merkezi», «Kreml siyasiy mabüsleri soy-soplarınıñ birleşmesi», «KrımSOS», «Qırım aq qorçalayıcı gruppası», «İnsan aqları media teşebbüsi» qoltuttı.
