Link açıqlığı

Saatnıñ esas haberi

Zelenskıy: «PACEniñ Rusiyeden ukrainalı deñizcilerni qaytarmasını nasıl talap etecegini körmege isteyim»


Volodımır Zelenskıy
Volodımır Zelenskıy

Ukraina prezidenti Volodımır Zelenskıy Avropa Şurası Parlament assambleyasınıñ Rusiyeden esir tutulğan ukrainalı deñizcilerni qaytarmasını nasıl talap etecegini «körmege istey», dep bildirdi. Bu aqta o, iyünniñ 25-nde PACEniñ Rusiyeniñ rey aqqını ğayrıdan tiklemek qararını izaatlap ayttı.

«PACEniñ Rusiye eyyetiniñ vekâletlerini sıñırsız tasdıqlamaq qararından közüm qayttı. Keçken afta bu meseleni Frenkistan prezidenti ve Almaniya kantsleri ile muzakere etken edim. Makron ve Merkelni Rusiye eyyetiniñ PACEge qaytması Rusiye Assambleyanıñ printsipial talaplarını yerine ketirgen soñ ola bile, dep inandırmağa tırıştım», – dep aytıla Zelenskıynıñ beyanatında.

Ukraina prezidentiniñ qayd etkenine köre, bugün, iyünniñ 25-nde, Halqara deñiz uquqı mahkemesiniñ ukrainalı deñizcilerni acele azat etüv buyruğını yerine ketirüv müddeti yekünlenmekte.

«Uquq üstünligi şartları amelde nasıl kerçekleştirilecegini sabırsızlıqnen bekleymiz», – dep aytıla haberde.

Ukrainanıñ beşinci prezidenti Petro Poroşenko Rusiye eyyetini qaytarmağa imkân berecek PACE qararı «Ukraina içün ciddiy bir işaret ola», dep bildirdi.

Ukraina baş naziri Volodımır Ğroysman Avropa Şurası Parlament assambleyasınıñ sanktsiyalarnı kirsetüv, hususan Rusiyege qarşı, tertibini qıyınlaştırğan qararını «istilâcınıñ intiqamı» dep adlandırdı.

Qırımtatar Milliy Meclisiniñ reisi Refat Çubarov PACEniñ Rusiye qararı sebebinden Mustaqillik Meydanında umummilliy toplaşuv keçirmege çağıra.

Avropa Şurası Parlament assambleyası iyünniñ 25-ne keçer gecesi keçirilgen toplaşuvında PACE qaidelerini deñiştirgen ve sanktsiyalarnı qullanuv tertibini, hususan Rusiyege qarşı, qıyınlaştırğan qararğa qoltuttı. Buña 118 PACE azası rey berdi, 62-si qarşı çıqtı, 10-u bitaraf qaldı.

Rusiye eyyeti Assambleya sessiyalarında 2015 senesi yanvar ayından itibaren, eyyetniñ vekâletleri ciddiy şekilde sıñırlanğan soñ, iştirak etmey.

Ukraina aq qorçalayıcılarınıñ fikirince, Rusiye eyyeti Avropa Şurası Parlament assambleyasına qaytsa, Rusiyeniñ teşkilât talaplarına riayet etmegen taqdirde bu devletlerara teşkilâtnıñ «ahlâqiy teslimiyeti» olacaq. Bu aqta aq qorçalayıcı teşkilâtlarınıñ PACE tertip, immunitet ve qurulış işleri komitetine, Avropa Şurası iştirakçi memleketleriniñ milliy eyyetlerine yapqan açıq muracaatında aytıla.

Muracaatqa 12 ukrain aq qorçalayıcı teşkilâtı, şu cümleden «Vatandaş serbestligi merkezi», «Kreml siyasiy mabüsleri soy-soplarınıñ birleşmesi», «KrımSOS», «Qırım aq qorçalayıcı gruppası», «İnsan aqları media teşebbüsi» qoltuttı.

XS
SM
MD
LG