Link açıqlığı

Saatnıñ esas haberi

PACE sessiyası Rusiye eyyetiniñ bu teşkilâttaki aqlarını qaytaruvına qoltuttı


Avropa Şurası Parlament assambleyası iyünniñ 25-ne keçer gecesi keçirilgen toplaşuvında PACE qaidelerini deñiştirgen ve sanktsiyalarnı qullanuv tertibini, hususan Rusiyege qarşı, qıyınlaştırğan qararğa qoltuttı. Buña 118 PACE azası rey berdi, 62-si qarşı çıqtı, 10-u bitaraf qaldı.

İşbu qarar leyhası PACE reglament komiteti tarafından iyünniñ 3-nde qabul etildi. Ukraina eyyeti ve ittifaqdaşları teklif etken vesiqa tüzetüvleri iyünniñ 24-nde saat 20:00-da baqılmağa başlap, 5 saattan ziyade devam etti.

Bu meseleniñ maruzacısı Belçikalı Petra de Sutter oldı, toplaşuv reisligini PACE prezidenti, İsviçreli Lilian Mori-Paskye yaptı.

Almaniya kantsleri Angela Merkel Rusiye eyyetiniñ Avropa Şurası Parlament assambleyasındaki aqlarınıñ ğayrıdan tiklenüvi belli şartlarda kerçekleştirile bile, dep aytqan edi.

«Rusiyeniñ Avropa Şurasına qaytuvı aqqında aytsaq, çeşit fikirlerimiz bar edi. Eki şeyni tüşünmek kerekmiz. Birinciden, Ukrainağa nisbeten halqara aqlarnıñ bozuluvı. Halqara toplulıqnıñ diqqatı celp etilecek bir mesele. Amma Rusiyeniñ qaytması içün belli şartlar yerine ketirilmeli, bu er angi vaziyette olmaz», – dedi Merkel Ukraina prezidenti Volodımır Zelenskıy ile keçken afta Berlinde keçirgen brifingde.

İyünniñ 17-nde Frenkistan prezidenti Emmanuel Makron onıñ memleketi Rusiyeniñ Avropa Şurasından tamamen çıqmasını istemey, dep bildirdi. Amma Ukraina prezidenti Volodımır Zelenskıy Parijde olıp, Avropa Şurası Parlament assambleyasınıñ Rusiye eyyetini qaytarmaq içün sebepleri yoq, dedi.

Rusiye eyyeti Assambleya sessiyalarında 2015 senesi yanvar ayından itibaren, eyyetniñ vekâletleri ciddiy şekilde sıñırlanğan soñ, iştirak etmey.

Ukraina aq qorçalayıcılarınıñ fikirince, Rusiye eyyeti Avropa Şurası Parlament assambleyasına qaytsa, Rusiyeniñ teşkilât talaplarına riayet etmegen taqdirde bu devletlerara teşkilâtnıñ «ahlâqiy teslimiyeti» olacaq.

Bu aqta aq qorçalayıcı teşkilâtlarınıñ PACE tertip, immunitet ve qurulış işleri komitetine, Avropa Şurası iştirakçi memleketleriniñ milliy eyyetlerine yapqan açıq muracaatında aytıla.

Muracaatqa 12 ukrain aq qorçalayıcı teşkilâtı, şu cümleden «Vatandaş serbestligi merkezi», «Kreml siyasiy mabüsleri soy-soplarınıñ birleşmesi», «KrımSOS», «Qırım aq qorçalayıcı gruppası», «İnsan aqları media teşebbüsi» qoltuttı.

XS
SM
MD
LG