Link açıqlığı

Saatnıñ esas haberi

Ukraina ve dünyada qırımtatar halqı sürgünliginiñ qurbanları añıla


Bazarertesi künü, mayısnıñ 18-nde, sovetler rejiminiñ qırımtatarlarnı tarihiy vatanları Qırımdan sürgün etkeniniñ 76-ncı yılı tola. Ukraina ve dünyada Qırımtatar halqınıñ sürgünlik ve genotsid qurbanları añılmaqta.

Koronavirus pandemiyası sebebinden kütleviy tedbirlerniñ keçirilüvi yasaqlandı, lâkin Kyiv ve Ukrainanıñ diger şeerlerinde aktsiyalarnıñ ötkerilmesi planlaştırıla. Herson şeer Meclisi istegi olğan er kesni mayısnıñ 18-nde qırımtatar sürgünligi qurbanlarınıñ hatıra taşına çeçek qoyıp, bu faciada elâk olğanlarnı añmasına çağıra. Meclis koronavirus yuqunçınıñ tarqaluvınen bağlı sıñırlavlarğa riayet etmege rica ete.

Qırımtatar Milliy Meclisiniñ reisi Refat Çubarovnıñ bildirgenine köre, mayısnıñ 18-nde saat 12:00-da esas Ukrainada ve Rusiye işğal etken Qırımda qırımtatar genotsidi qurbanlarınıñ hatırasına sessizlik daqqası ilân etilecek.

Ukraina prezidentiniñ Qırım Muhtar Cumhuriyetindeki daimiy temsilciligi qırımtatar halqı sürgünliginiñ qurbanlarını añıp, aktsiyada iştirak etmege davet ete. Daimiy vekil Anton Korınevıç qırımtatar bayraqlarını asıp, ölgenlerniñ hatırasına çıraq yaqmağa rica etti.

Mayısnıñ 18-nde bir sıra telekanal «Ukrainanıñ online mektebi» leyhası çerçivesinde orta ve üyken sınıflarnıñ talebeleri içün Qırımtatar halqı genotsidiniñ qurbanları hatırasına mahsus ders yayınlaycaq. İştirak etecekler arasında qırımtatar asıllı ukrainalı yırcı Jamala ve qırımtatar asıllı ukrainalı rejissör Nariman Aliyev barlar.

Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.

Qırımtatar faali, Qırımtatar Milliy Meclisiniñ reis muavini Nariman Celâl yarımadadaki semetdeşlerine qırımtatar halqı genotsidiniñ yılına – mayısnıñ 18-ne – ev ve balkonlarda qara şeritli qırımtatar bayraqlarını asmağa teklif ete.

Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.

Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.

Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.

XS
SM
MD
LG