Herson şeeriniñ Meclisi mayısnıñ 18-nde qırımtatar sürgünligi qurbanlarınıñ hatıra taşına çeçek qoyıp, bu faciada elâk olğan ve zarar körgenlerni añmağa çağıra.
Meclis, koronavirus yuqunçınen bağlı sıñırlavlarğa riayet etmege de çağıra.
«Herson şeer Meclisi ve bir qaç cemaat teşkilâtı bu vaziyette belli olmağan müddetke qaldırılğan medeniy-maarifçilik tedbirlerini planlaştırğan ediler. Hersonda çeçek qoymağa teklif etemiz, saat 9:00-dan 12:00-ğa qadar, küçük gruppalarnen, sıñırlavlarğa riayet etip», – dep aytıla ilânda.
Meclis, Qırımnıñ tamır halqı ile birdemlik olaraq qırımtatar bayraqlarını asmağa ve qara şeritni bağlamağa çağıra.
Qırımtatar Milliy Meclisiniñ reisi Refat Çubarov mayısnıñ 17-18-nde keçirilecek qırımtatar halqınıñ genotsid qurbanlarınıñ hatırasına bağışlanğan añma tedbirleriniñ azırlanılğanını ilân etken edi. O, Kyiv şeer yolbaşçısı Vitaliy Klıçkoğa Qırımtatar halqı genotsidiniñ qurbanlarını añma kününen bağlı muracaat etti.
Aprel ayında Qırımda Rusiye politsiyası qırımtatarlarğa tenbi vesiqalarını berip başladı. Aralarında qırımtatar milliy areketiniñ faalleri, «Qırım birdemliginiñ» aq qorçalayıcıları ve jurnalistleri bar edi. Bu tenbilerde «ekstremist faaliyeti qabul etilmeycek» dep aytıla, hususan mayısnıñ 18-nde, qırımtatarlar 1944 senesiniñ sürgünlik qurbanlarını añğanda.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
