Ukraina Tış işler nazirligi halqara toplulıqnı ilhaq etilgen Qırımda «insan aqları bozulğanına köz yummamasına» çağırdı. Laf Aqmescit SİZOsınıñ tibbiy bölüginde bulunğan qırımtatar faali Edem Bekirovnıñ sağlıq vaziyeti aqqında kete. Haberni Ukraina Tış işler nazirliginiñ spikeri Katerina Zelenko Twitterde yerleştirdi.
«Saqatlığı olğan qırımtatarı Edem Bekirov tutulğan işğal etilgen Aqmescitten telâşlı haberler kele. Sağlıq vaziyeti fenalaşmağa devam ete. Halqara toplulıqnı insan aqları bozulğanına köz yummamasına çağıramız», – dep aytıla haberde.
İyülniñ 23-nde Yuqarı Rada vekâletlisi Lüdmila Denisova Rusiye ombudsmeni Tatyana Moskalkovağa Edem Bekirovnıñ sağlıq vaziyeti sebebinden muracaat etti.
Haber etilgeni kibi, Bekirovğa qarşı cinaiy dava Aqmescitteki Rusiye mahkemesinden Krasnoperekopsk rayon mahkemesine yollanıldı.
İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.
Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.
Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
