Ukraina Tış işler nazirligi binasında mayısnıñ 18-nde qırımtatar halqı genotsidiniñ 77 yılına bağışlanğan sergi açıldı, dep haber ete Ukraina nazirliginiñ matbuat hızmeti, dep bildire Qırım.Aqiqat mühbiri.
Sergide 1944 senesiniñ sürgünliginden evel ve soñra Qırım tarihını köstergen eki bediiy leyha işleri taqdim etildi.
Birincisi – Fatima Osmanova ve Eldar Halilniñ «Hırsızlanğan Qırım» areketleştirilgen foto leyhası – qoranta arhivinden malümatnı köstere ve qırımtatar halqınıñ sürgünlikteki medeniy yaşayışı aqqında tarif ete.
Ekinci leyha – ukrainalı ressam Yuriy Himiçniñ «Qırımnıñ qadimiy devri» eserleri – 1950-1982 seneleriniñ Qırımına bağışlanğan yüzlernen grafik ve dülber eserden ibaret.
«Tış işler nazirligini ziyaret etken er bir çetel musafiri – nazirler, parlament yolbaşçıları, ükümet reisleri – bu sergini körecekler. Bu şimdi bir çoq dünya memleketini birleştirgen iş aqqında canlı ve küçlü bediiy hatırlatuv ola: qırımtatar halqını qoruv ve Qırımnı işğalden qurtaruv», – dep ayttı sergi açılışında Ukraina Tış işler naziri Dmıtro Kuleba.
Sergi açılışında qırımtatar halqınıñ lideri Mustafa Cemilev ve Qırımtatar Milliy Meclisiniñ reisi Refat Çubarov, Ukraina pravoslav kilsesiniñ mitropoliti Yepifaniy, Qırım musulmanları diniy idaresiniñ reisi Ayder Rustemov, Ukraina prezidentiniñ Qırım Muhtar Cumhuriyetindeki daimiy vekili Anton Korınevıç, Khymych Art Foundation reberi Petro Zuyev ve Khymych Art Foundation tesisçileri Mihaylo Hımıç ve Ğenadiy Druzenko iştirak etkenler.
Salı künü, mayısnıñ 18-nde, sovetler qırımtatarlarnı Qırımdan sürgün etip başlağanına 77 yıl tola. Ukraina ve dünyada qırımtatar halqı genotsidiniñ qurbanları añıla.
Aqmescitte mayısnıñ 18-nde Lenin bulvarında, tren vokzalı yanında, qırımtatar halqı genotsidiniñ qurbanları hatırasına tedbirler keçirildi. Qırımtatar faalleriniñ aytqanına köre, tedbirler adet üzre keçirilgen abide yanında Rusiye polisi bar edi.
Bugün Ukraina ve dünyada qırımtatar halqı genotsidiniñ qurbanları añıla. Ukraina prezidenti Volodımır Zelenskıy Ukraina akimiyeti Qırım yarımadasını kontrol altına qaytarmaq içün ğayret köstere, dep qayd etti.
Türkiye Tış işler nazirligi qırımtatarlarğa qol tutmağa ve «Qırımnıñ qanunsız ilhaqından soñ zulumnı toqtatmağa tırışmağa» devam etecek, dep bildirdi.
Mayıs 18 qırımtatar genotsidiniñ qurbanlarını añma yıllığına Kanadanıñ New Brunswic vilâyetiniñ paytahtı Fredericton Ukrainanıñ Kanada elçihanesiniñ teşebbüsine qoşulıp, qırımtatar bayrağını köterdi.
Qırımtatar halqı genotsidiniñ qurbanlarını añma künü
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
