Ukraina ombudsmanı Lüdmila Denisova dünya toplulığını işğal etilgen Qırımda Rusiye akimiyetiniñ fevralniñ 9-nda yañı tintüvler ve qırımtatar falleriniñ tevqif etilmesi ile bağlı areketlerine qarşılıq köstermege çağırdı.
"Muvaqqat işğal etilgen qırımtatarlarğa qarşı nevbetteki zulum... Dünya toplulığını RF-nıñ bu kibi areketlerini qatiyen takbih etmege, muvaqqat işğal etilgen Qırım MC ve Aqyar şeerinde insan aqlarınıñ bozulmasınıñ toqtatalması içün Rusiyege tazyıqnı arttırmağa çağıram", - dep yazdı o Facebook saifesinde.
Fevralniñ 9-nda tüntüvlerden soñ tutulğan dört qırımtatar faali eki ayğa tevqif etildi. Aqmescitniñ Kiyev rayon mahkemesi Marlen Mustafayevni ve İmethan Abdullayevni aprelniñ 7-ne qadar tevqif etti. Olar Aqmescitniñ 1-nci SİZO-sında tutulacaqlar.Aqyarnıñ Lenino rayon mahkemesi Ansar Osmanov ve Ernes Seytosmanovnıaprelniñ 6-na qadar tevqif etti. Olar SİZO-da tutulacaqlar.
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler. Tutulğan qırımtatar faali Ansar Osmanovnıñ ömür arqadaşı Meryem, saba keçirilgen tintüv vaqtında Rusiye quvetçileri kitaplar qoyıp ketkenini bildire.
"Qırım birdemligi" cemaat birleşmesinde qayd etkenleri kibi, tutulgan Ansar Osmanov, Ernest Seytosmanov ve Marlen Mustafayev "Qırım musulmanları davaları"nıñ mahkeme oturışlarına qatnağa faallerdir.
Rusiye Federal telükesizlik huzmeti, feralniñ 9-nda Qırımda keçirilgen tintüvlerden soñ tutulğan dört qırımtatarnıñ "Hizb ut-Tahrir" areketi ile alâqası olğanını ve "anayasağa qarşı faalit" etkenini bildire.
Ukraina TİN yolbaşçısınıñ birinci muavini Emine Ceppar qırımtatarlarnıñ evlerinde keçirilgen yañı tintüvlerni izaat etip, Rusiyeni "Qırımdan def olıp ketmege" ve qanunsız sürette tutulğan bütün Ukraina vatandaşlarını azat etmege çağırdı.
Qırım MC ve Aqyar şeeri prokuraturası Rusiye quvetçileriniñ qırımtatarlarnıñ evlerinde keçirgen tintüvlerden soñ Ukraina Ceza qanunnamesiniñ 162-nci maddesiniñ 2-nci qısmına binaen cinayet davasını açtı.
