İşğal etilgen Qırımda terroristik faaliyetinde qabaatlanğan, 20 yıllıq şiddetli rejim koloniyasına mahküm etilgen ukrain rejissörı Oleg Sentsov, 95 künden berli açlıq tuta.
Bir kün evel Kreml, açlıqnı tutqan Sentsovniñ özü Rusiye prezidenti Vladimir Putinge mefa aqqında ariza ile muracaat etmege kerek olğanını bildirdi.
Aynı vaqıtta «Agora» halqara insan aqlarını qorçalav teşkilâtınıñ başı Pavel Çikov ve qız qardaşı Natalya Kaplan, mabus afu istep Putinge muracaat etecek degen malümatnı red etti.
Avgustnıñ 14-ünde Oleg Sentsov rusiye uquqqoruyıcısı Zoya Svetovağa alı «havflığa yaqın» dep ayttı.
Daa evel advokat Dmitriy Dinze Sentsovnı ziyaret etken soñ, onıñ saqlıq alı fena olğanını bildirdi. Aynı vaqıtta ukrain rejissörı, açlığını toqtatmacağını bildirdi.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi. O, mayısnıñ 31-nde «onı deñiştirüv meraqlandırmağanı», çünki o «soñuna qadar baracaq insan olğanını» ilân etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatını tanımay.
“Memorial” uquqqoruyıcı merkez Sentsov ve Kölçenkonı siyasiy mabüsler cedveline kirsetti.
