Rusiye uquqqoruyucısı Zoya Svetova avgustnıñ 14-ünde açlıqnı ilân etken ukrain rejissöri Oleg Sentsovnı rusiye koloniyasında ziyaret etti. Uquqqoruyucı Sentsov alı havflığa yaqın dep aytqanını haber etti. Bunıñ aqqında o RTVI-ğa ikâye etti.
Svetova rejissörnen koloniya başı ve daa eki hadimi yanında eki saat devamında qonuşqanı habet etile.
Uquqqoruyucı aytqanına köre, Sentsov “yahşı ve temiz” dört yerlik palatada buluna.
“Sentsovnıñ işanğan koloniya ekimleri, yapıp olğanını yapa, amma iç bir tahminler etmey. Advokat, oña tamçılıq yapılğanını ve ğıdalı qarışmalar berilgenini ayttı. Amma bu onı sağ qaldıracaq vaziyet degil”, - Svetovanıñ sözlerinden yaza RTVI.
Uquqqoruyıcı qoştı ki, Sentsov açlığınıñ talabı deñişmedi: ukrain siyasiy mabüslerni rusiye apishanelerinden çıqarmaq.
Daa evel advokat Dmitriy Dinze Sentsovnı ziyaret etken soñ, onıñ saqlıq alı fena olğanını bildirdi. Aynı vaqıtta ukrain rejissörı, açlığını toqtatmacağını bildirdi.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilan etken edi. O, mayısnıñ 31-nde «onı deñiştirüv meraqlandırmağanı», çünki o «soñuna qadar baracaq insan olğanını» ilân etken edi.
Sentsov ve Aleksandr Kolçenko Rusiye mahsus hizmetleriniñ vekilleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniyasına qalmağa mahküm etti. Kolçenkoğa 10 yıl koloniya cezası berildi. Ekisi de qabaatını tanımay.
“Memorial” uquqqoruyıcı merkez Sentsov ve Kölçenkonı siyasiy mabüsler cedveline kirsetti.
