Rusiye koloniyasında apis olunğan Oleg Sentsov, aman-aman 3 aylıq açlığı neticesinde, 30 kilogrammğa azdı ve onıñ yürek problemaları peyda oldı dep avgustnıñ 7-sinde mabüsniñ advokatı Dmitriy Dinze AFP agentligine haber etti.
Agentlikke tefsir bergende o, rusiye akimiyeti rejissörnıñ sağlığı “bir coruq” degeninen razı olmağanını ayttı: “Razı degilim, onıñ alı fena”.
Avgustnıñ 7-sinde apishanede Sentsovnı ziyaret etken Dinze, onıñ gemoglobini pek alçaq seviyede olğanını ve nabızı daqqada 40 uruşqace eksilgenini ayttı.
“Onıñ sıfatı yaramay, amma bunı baş etmege tırışa” – Dinzeniñ sözlerinde yaza AFP.
Rusiye advokatı haber etkenine köre, Sentsov ölmege mümkün olğanını bile: “E, o öz noqta-i nazarı içün soñunace küreşmege azır”.
Avgustnıñ 7-sinde ukrain rejissöri açlıqnı toqtatmacağı aqqında haber etti.
Oleg Sentsov mayısnıñ 14-nde Rusiye apishanelerinde yatqan bütün ukrain siyasiy mabüslerniñ azat etilmesi talabınen muddetsiz açlıq ilân etken edi. O, mayısnıñ 31-nde «onı deñiştirüv meraqlandırmağanı», çünki o «soñuna qadar baracaq insan olğanını» ilân etken edi.
İyün 14-te Avropa parlamenti Rusiyeden, qanunsız yaqalanğan, tevqif ve apis etilgen bütün Ukraina siyasiy esirlerini deral azat etmege çağırdı.
İyünniñ 18-inde AQŞ-nıñ Devlet departamenti Rusiyeni siyasiy mabüslerni azat etmege çağırttı ve uquqqoruyucılar ve diniy azlıq azalarınıñ tevqiflerniñ sayısı artqanınından raatsızlıq duydurdı.
Ukraina ve bütün dünyada faalcileri Rusiye ve presidenti Vladimir Putinden qanunsız yaqalanğan ukrain mabüslerini azat etmege talap ete. Aktsiyalar #FreeOlegSentsov ve #SaveOlegSentsov şiarlarınen çeşit-türlü memleket ve ülkelerde keçe.
