Qırımtatar genotsidiniñ qurbanlarını añma künü munasebetinen «Sarı şerit» areketiniñ iştirakçileri aktsiya teşkil etti. Bu aqta areketniñ Telegram kanalı haber ete.
Faaller «Qırım – Ukrayinadır» ve «Unutmadıq – 1944» yazısınen risalelerniñ Aqmescit, Kezlev ve Bağçasaray soqaqlarında fotoresimlerini çıqardı.
«Er yıl mayısnıñ 18-nde Ukrayinada Qırımtatar halqı genotsidiniñ qurbanlarını añma künü qayd etile. 1944 senesi şu künü Stalinniñ emrinen qırımtatar sürgünligi başladı. Biz keçmişni unutmamaq kerekmiz, Qırımnıñ azatlığı oğrunda küreşkenlerge qoltutmaq ve işğalge beraber tirenmek kerekmiz», – dep aytıla haberde.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
Bıltır oktâbrniñ 9-nda Ukrayina Yuqarı Radası çetel devletleriniñ ükümetleri ve parlamentlerini qırımtatarlarnıñ 1944 senesi Qırımdan sürgün etilüvini qırımtatar halqınıñ genotsidi olaraq tanımağa çağırdı.
Dekabrniñ 18-nde Çehiya Senatı 1944 senesi qırımtatar sürgünligini genotsid olaraq tanıdı. Qayd etilgen 74 senatordan 70-i bu qararğa rey berdi.
Oktâbrniñ ortasında Estoniya parlamenti 1944 senesi sovet rejimi tarafından qırımtatar halqınıñ sürgünligi genotsid olaraq tanılğanı aqqında beyanatnı tasdıqladı.
Qırımtatar halqınıñ lideri Mustafa Cemilev Azatlıq Radiosına bergen intervyüsında Çehiya akimiyeti başqa memleketlerni 1944 senesi qırımtatar halqınıñ sürgünligini genotsid olaraq tanımağa iqna etmek içün öz tesirini qullanmağa söz berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
