Rusiyeniñ Rostov vilâyetiniñ Bagayevskiy rayon mahkemesi imayeniñ mahküm etilgen cemaat jurnalisti, bloger ve «Qırım birdemligi» cemaat areketiniñ media-koordinatorı Nariman Memedeminovnı şartlı olaraq vaqtından evel azat etmek muracaatını qanaatlendirmedi. Bu aqta advokat Emil Kurbedinov Qırım.Aqiqatqa haber etti.
«Nariman Memedeminovnıñ şartlı olaraq vaqtından evel azat etilüvi aqqında muracaat baqılğan mahkeme oturışuvı olıp keçti. Muracaatımız qanaatlendirilmedi. Bunıñ sebepsiz ve qanunsız olğanını tüşünemiz», – dep bildirdi Kurbedinov.
Onıñ aytqanına köre, mahkeme Memedeminovnıñ şartlı olaraq vaqtından evel azat etilmesine bulunğan koloniyadan kelgen «menfiy hasiyetname» sebebinden izin bermedi.
«Nariman koloniyada çalışmağa razı olmağan eken. Onı ağzaviy şekilde tenbilediler, şunıñ içün koloniya onı menfiy ceetten tasvirley», – dep qayd etti Kurbedinov.
Memedeminov sağlıq vaziyeti sebebinden çalışıp olamağanını añlattı, dep ayttı advokat.
Kurbedinovnıñ qayd etkenine köre, o, Memedeminovnıñ şartlı olaraq vaqtından evel azat etilmemesini şikâyet etmege niyetlene.
«Sentâbrniñ 21-nde Nariman azatlıqqa çıqmalı. Ceza çeküv müddeti bite», – dep bildirdi imayeci.
Kurbedinovnıñ bildirgenine köre, Memedeminovnıñ maneviy alı bir qarar, amma sağlıq problemleri bar.
2020 senesi iyün ayınıñ başında Memedeminovnı Rostov vilâyetindeki Sadkovskiy qasabasında olğan №8 yaşav tarzı koloniyasına avuştırğanlar.
2019 senesi oktâbr ayında mahkeme Memedeminovnı eki buçuq yıl yaşav tarzı koloniyasında qalmasına üküm etti. İmayesi Avropa insan aqları mahkemesine muracaat etmege niyetlengenini bildirdi.
Bir sıra Ukraina aq qorçalayıcı ve media teşkilâtı halqara teşkilâtlarnı ve Avropa Birligi memleketleri, ABD, Kanada, Yaponiya ükümetlerinden Rusiyeden Memedeminovnı azat etmesini talap etmesine çağırdı.
Moskva vilâyetindeki Vlasiha Arbiy istinaf mahkemesi mayısnıñ 14-nde qırımlı bloger, cemaat jurnalisti Nariman Memedeminovnı terror faaliyetine açıq çağırğanında qabaatlağan ükümni deñiştirmedi.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
