Mayısnıñ 14-nde Moskva vilâyetiniñ Vlasiha şeerindeki Arbiy istinaf mahkemesinde eki buçuq yıl yaşav tarzı koloniyasında qaluv ükmü deñiştirilmegen cemaat jurnalisti Nariman Memedeminovnıñ imayesi Avropa insan aqları mahkemesine muracaat etmege niyetlene.
Bundan ğayrı, cemaat jurnalistiniñ advokatları Memedeminov tutulğan Rostov-na-Donudaki SİZO reberliginden müvekkiliniñ yaşav tarzı koloniyasına tez avuştırılmasını talap etecek.
Bu aqta advokat Edem Semedlâyev Qırım.Aqiqatqa bildirdi.
«Elbette, mahkeme qararından memnün degilmiz, çünki bizim ve Narimannıñ istinaf arizası qanaatlendirilmedi. Avropa mahkemesi içün malümat azırlaycaqmız. Temyiz qurulışı meselesinde Narimannen laf etecekmiz. Eñ yaqın vaqıtta Qırımdan uzaq olmağan bir koloniyağa avuştırıluvı içün ne yapmalımız dep tüşünecekmiz. Narimannıñ üküm müddeti bu sene sentâbr ayında bite», – dep tarif etti advokat.
2019 senesi oktâbr ayında mahkeme Memedeminovnı eki buçuq yıl yaşav tarzı koloniyasında qalmasına üküm etti.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
