Moskva vilâyetindeki Vlasiha Arbiy istinaf mahkemesi mayısnıñ 14-nde qırımlı bloger, cemaat jurnalisti Nariman Memedeminovnı terror faaliyetine açıq çağırğanında qabaatlağan ükümni deñiştirmedi.
Bu aqta advokat Edem Semedlâyev Qırım.Aqiqat mühbirine bildirdi.
Mahkeme oturışuvında Memedeminov zenaatdaşlarını Qırımdaki taqiplerni aydınlatmasına çağırdı.
«Sayğılı jurnalist toplulığı, tecribeli jurnalist, bloger, cemaat jurnalistleri. Maña qarşı sahte cinaiy dava, aslında ise tam bir taqip devam etkende yapqan er şeyimiz içün sizge büyük minnetdarlığımnı bildirmege isteyim. Bilmeyim, amma eminim, bu yönelişte çalışmağa devam etesiñiz ve Qırımda olıp keçkenlerni, anda Rusiye qanunı kelgen soñ mustaqil jurnalistlerniñ vaziyeti ne olğanını aydınlatasıñız. Yapqan işiñiz pek doğru. Şunıñ içün daa bir kere tekrarlayım, sağ oluñız. Sizden ileride de Qırımda diniy, milliy ve zenaat sebeplerinden olğan taqiplerge diqqat ayırmañıznı rica etem. Tezden siznen parmaqlıqtan degil, şahsen körüşmege ümüt etem», – dep ayttı Nariman Memedeminov.
Mahkeme mesleat odasına keçken soñ, bloger qararnen bağlı hayalları yoq dedi: «Mahkeme qararınen bağlı bir hayal qurmayım. Er bir qarar insanlarğa degil, Allahqa aittir, dep çoq aytqan edim. Aynı vaqıtta bu insanlar (qadılar – QA) tarafından bir adalet olacağına ümüt etem ve neticede uyğun bir qarar bekleyim».
2019 senesi oktâbr ayında mahkeme Memedeminovnı eki buçuq yıl yaşav tarzı koloniyasında qalmasına üküm etti.
Bir sıra Ukraina aq qorçalayıcı ve media teşkilâtı halqara teşkilâtlarnı ve Avropa Birligi memleketleri, ABD, Kanada, Yaponiya ükümetlerinden Rusiyeden Memedeminovnı azat etmesini talap etmesine çağırdı.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
