Bir sıra Ukraina aq qorçalayıcı ve media teşkilâtı halqara teşkilâtlarnı ve Avropa Birligi, ABD, Kanada, Yaponiya ve diger memleketlerniñ ükümetlerini Rusiyeden qırımlı bloger, cemaat jurnalisti Nariman Memedeminovnı azat etmesini talap etmesine çağıra.
Muracaat ZMINA teşkilâtınıñ saytında derc etildi.
Aq qorçalayıcılar halqara teşkilâtlarnı, hususan BM, OSCE, Avropa Şurasını buña çağıra:
- Rusiyeden Nariman Memedeminov, diger jurnalist ve faallerni azat etmesini, Qırımda söz serbestligini toqtatmasını talap etmek;
- Rusiye mahkemelerinde ve Qırımnıñ Rusiye mahkemelerinde Ukraina vatandaşlarına qarşı siyasiy sebeplerden başlatılğan mahkeme esnaslarınıñ monitoring keçirilüvine yardım etmek;
- Qırımda İnsan aqları, söz serbestligi ve jurnalistlerniñ aqlarını qoruvğa riayet etüv vaziyetinen bağlı mustaqil monitoring missiyasınıñ işini temin etmege yardım etmek.
Mayısnıñ 14-nde Vlasiha şeeriniñ (Moskva vilâyeti) Arbiy istinaf mahkemesi Memedeminovnıñ ükmüne qarşı berilgen istinaf şikâyetini baqacaq.
Advokat Edem Semedlâyevniñ Qırım.Aqiqatqa aytqanına köre, Rusiye mahkemesi müvekkiliniñ ükmünen bağlı istinaf baqıluvını aselet sozması mümkün.
Rusiyeniñ Rostov-na-Donu Cenübiy arbiy okrugınıñ mahkemesi keçken seneniñ oktâbr ayında terrorizmge açıq şekilde çağırğanında qabaatlanğan Memedeminovnıñ ükmüni çıqardı. Mahkeme Memedeminovnı 2 yıl ve 6 ay yaşav tarzı koloniyasında qalmasına üküm etildi.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
