Rusiye tarafından mahküm etilgen 60-tan ziyade qırımlı acele tibbiy yardımğa muhtac, dep bildire ZMINA insan aqları merkezi.
"Siyasiy mabüslerniñ apishanede qarşılaşqan esas meselelerinden biri, tibbiy yardımnıñ muntazam red etilmesidir, hususan saqatlar, esli-başlılar, hronik hastalıqları olğanlar, ya da ağır hastalıqlarğa oğrağan ve yaramay şaraitlerden sebep işkencege oğrağanlar. Er bir insan bir şekilde hastalana, adiy ayatta olsa da, apiste olsa da. Amma apishanede bu daa sıq ola, hastalıqlarnıñ ketişatı daa ağır ola, yañı hastalıqlarnıñ peyda olma telükesi ise daa yüksek ola", — dep aytıla haberde.
ZMINA qayd etkenine köre, tibbiy yardımğa muhtac olğanlarnıñ sayısı arttı, Rusiye tarafından taqip etilgenlerniñ bazıları kritik vaziyette buluna. Bu Tofik Abdulgaziyev, İrına Danılovıç, Aleksandr Sizikov ve Amet Suleymanov kibi siyasiy mabüslerge aittir.
Soñki ay içinde hasta qırımlılarnıñ cedveline eki kişi qoşuldı — Ruslan Adburrahmanov ve Rustem Gugurik, ve bugün cedvelde 67 insan bar, yani keçken senege köre 22 insan çoq.
Qırımtatar resurs merkeziniñ bildirgenine köre, Qırımda Rusiye quvetçileri yarımadanıñ yedi saqatını taqip ete, olardan altısı apishanede tutula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
