Rusiye Tış işler nazirliginiñ resmiy vekili Mariya Zaharovanıñ fikirince, halqara teşkilâtlar Ukraina tarafınıñ işğal etilgen Qırım vaziyetine dair malümatına esaslanmamalı. O emin ki, Ukrainanıñ yarımadada olğanlardan haberi yoq.
Zaharova, Qırımda insan aqları bozulğanını takbih etken Ukrainanıñ quvetleştirilgen qararınıñ BM Baş Assambleyasınıñ Komiteti tarafından qabul etilgenine cevap berdi.
«Bir çoq halqara qurulış kerçek vaziyetni bilmeyip, Qırımdaki gumanitar vaziyet ve insan aqları aqqında qararlar ala, çünki, ne yazıq ki, anda olğanlardan haberi olmağan Ukraina tarafınıñ fikirlerine esaslana. Bir çoq halqara sahte «ekspert» hulâsalar çıqara, özüni Qırım meselesinde ekspert dep tanıta, anda bir kere bile barmayıp, anda olğanlarnı körmediler», – dep bildire Zaharovanıñ aytqanlarını Rusiye Tış işler nazirliginiñ matbuat hızmeti.
Ukraina tarafı bu laflarğa daa cevap bermedi.
2020 senesi noyabrniñ 18-nde BM Baş Assambleyasınıñ Komiteti Qırımda insan aqlarınıñ bozuluvını takbih etken quvetleştirilgen qararnı taqdirledi.
Rey berüvden soñ Ukraina Tış işler naziri Dmıtro Kuleba OSCE ve BM insan aqları missiyasını Rusiye işğal etken Qırımda monitoringni quvetleştirmelerine çağırdı.
Rusiye Tış işler nazirligi qabul etilgen Qırım qararı leyhasınıñ «siyasetniñ tesiri altında qaldı», dep bildirdi. Rusiye nazirliginiñ spikeri Mariya Zaharova Qırımda halqara missiyalarnı Rusiye şartlarınen qabul etmege azırlar, dep qayd etti.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
