Rostov-na-Donunıñ Cenübiy bölgesiniñ arbiy mahkemesinde Rusiye prokurorı Vladislav Küznetsov mahkemeden qırımtatar faali, Qarasuvbazarlı çilengir Marlen Mustafayev içün 18 yıl apis cezasını istedi. Bunı "Qırım birdemligi" cemaat birleşmesi haber etti.
Haber etilgeni kibi, qabaatlav tarafı Mustafayev içün ilk 5 yılnı daa ağır cezaçekme müessiselerinde keçirüv ile 18 yıl sert apis cezasını istedi. Rusiye prokurorı Mustafayevniñ azat etilmesinden soñ areket azatlığını 2 yılğa sıñırlamağa teklif etti.
Rusiye qabaatlavınıñ versiyasına köre, Marlen Mustafayev Azamat Eyupov, Riza Ömerov, Enver Ömerov, Ayder Caparov ile beraber Rusiyede yasaq etilgen "Hizb ut-Tahrir" teşkilâtınıñ toplaşuvlarını keçirgen ve dersiñ "akimiyetniñ zorlav ile elge keçirilmesine azırlıq maqsadını taşığan areketler ömürge kerçekleştirgen".
Mustafayevniñ advokatı Yekaterina Boyko "cinayet esnasınıñ esaslarınıñ bozulması" ve "salâhiyetli operativ hadimniñ ifadesiniñ uyğunsızlığı" aqqıda bildirdi
Evel, Rusiye mahkemesi qırımlı Marlen Mustafayevni 2023 senesi fevralniñ 10-nace tefqifli qaldırdı.
Fevrlniñ 9-nda saba Rusiye quvetçileri tarafından yaqalanğan qırımtatarlarnıñ aqrabaları, tintüvler saba saat 4-te başlanğanını, aynı zamanda telefon alâqası ve advokatlarnen bağlanmağa çaresi olmağanını bildirdiler. Tutulğan qırımtatar faali Ansar Osmanovnıñ ömür arqadaşı Meryem, saba keçirilgen tintüv vaqtında Rusiye quvetçileri kitaplar qoyıp ketkenini bildire.
"Qırım birdemligi" cemaat birleşmesinde qayd etkenleri kibi, tutulgan Ansar Osmanov, Ernest Seytosmanov ve Marlen Mustafayev "Qırım musulmanları davaları"nıñ mahkeme oturışlarına qatnağa faallerdir.
Rusiye Federal telükesizlik huzmeti, feralniñ 9-nda Qırımda keçirilgen tintüvlerden soñ tutulğan dört qırımtatarnıñ "Hizb ut-Tahrir" areketi ile alâqası olğanını ve "anayasağa qarşı faalit" etkenini bildire.
Ukraina TİN yolbaşçısınıñ birinci muavini Emine Ceppar qırımtatarlarnıñ evlerinde keçirilgen yañı tintüvlerni izaat etip, Rusiyeni "Qırımdan def olıp ketmege" ve qanunsız sürette tutulğan bütün Ukraina vatandaşlarını azat etmege çağırdı.
Qırım MC ve Aqyar şeeri prokuraturası Rusiye quvetçileriniñ qırımtatarlarnıñ evlerinde keçirgen tintüvlerden soñ Ukraina Ceza qanunnamesiniñ 162-nci maddesiniñ 2-nci qısmına binaen cinayet davasını açtı.
