Aqmescitte 30-ğa yaqın kişi qırımtatar sürgünliginiñ qurbanlarını sessizlik daqqası ve duanen añdı. İnsanlar hatıra taşı olğan tren vokzalında toplaştı.
Qırım.Aqiqat mühbiriniñ bildirgenine köre, Rusiye uquq qoruyıcı organlarınıñ hadimleri toplaşqanlarğa keder etmedi, amma operativ video çıqardı.
Hatıra taşı etrafında on beş politsiya hadimi tura edi, daa beş kişi adiy urbada yaqında tura edi.
Toplaşqanlarnıñ aytqanına köre, bir çoq insan sürgünlik qurbanlarını añmaq içün saat 12:00-dan evel kelip ketti, bunı hatıra taşı yanında qoyulğan çeçekler de isbatlay. Eñ az eki demet sarı-mavı renklerde yapılğan.
Qırımnıñ Qurman qasabasında mayısnıñ 18-nde qırımtatar milliy areketiniñ faalleri genotsid qurbanlarını añdı: hatıra taşına çeçek qoyıp, dua oqudılar. Tedbir Rusiye quvetçileriniñ nezareti altında keçti.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq. Qırımnıñ Rusiye akimiyeti, COVID-19 sebebinden bütün sanitar normalarına riayet etip, hatıra abidelerine çeçekler qoyulacaq, dep bildirdi.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.
