Aqyarda gece ava telükesi ilân etilgen edi, Rusiye kontrolindeki şeer başı Mihail Razvojayev balistika telükesi aqqında haber etken edi, amma altı daqqadan soñ telüke lâğu etildi. Bunıñnen beraber, "Krımskiy veter" telegram kanalı yerli sakinlerge atıf etip Novofedorovka rayonında patlavlar aqqında yazdı.
Berilgen malümatqa köre, Rusiyeniñ Sakq arbiy uçaq alanında patlavlar eşitildi. "Krımskiy veter"niñ yazğanına köre, bundan soñ anda yanğın çıqtı ve bir müddet devamında patlav sesi eşitildi. Patlavlar aqqında "Suspilne Qırım" de haber etti.
Bundan da ğayrı, Kezlevde yüksek sesler eşitildi. Yerli sakinlerniñ Qırım telegram kanallarında yazğanlarına köre, sesler RF Ava mudafaasınıñ işine oşağan.
Rusiye arbiyleri ve Qırım akimiyeti bu aqta bir şey bildirmedi. Bu malümatnıñ başqa menbalardan tasdıqlanması şimdilik yoq. Ukrayina tarafı bu haberlerni daa izaatlamadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
