Noyabrniñ 14-nde aqşam Rusiye arbiyleri Odesa ve vilâyetine ücüm etken uçaqlar ile ücüm etti, elâk olğan ve yaralanğanlar bar, vatandaş infrastruktura zarar kördi. Bu aqta Odesa vilâyetiniñ arbiy memuriyetiniñ başı Oleğ Kiper bildirdi.
Onıñ malümatına köre, ücüm neticesinde bir qadın elâk oldı, sekiz insan yaralandı, olarnıñ arasında doquz yaşındaki bala bar.
"Yaşayış evleri, kilse, tahminen 30 maşna zarar kördi. Bazı yerlerde yanğınlar çıqtı. Bir çoq qatlı ev viran etildi. Bundan ğayrı, issilik teminleviniñ magistral borusı da zarar kördi. Odesada qazanlıqlardan biriniñ işi toqtatıldı. Zarar körgen issilik ağınıñ dalı 220 çoq qatlı evni (40 biñ sakin), yedi bala bağçasını, dört mektepni qızdıra edi. Bundan ğayrı, Odesadaki bala doğuruv evlerinden birinde hızmet ete edi. Şimdi anda 28 qadın ve 22 bala buluna", — dep yazdı OVA yolbaşçısı öz telegram kanalında.
Rusiye arbiyleri çeşit silâlar yardımınen muntazam sürette ukrayin regionlarına ücüm ete. Delillerge ve şaatlıqlarğa baqmadan, Moskva, tam bir istilâ başlağanından berli, vatandaşlarğa nisbeten yapılğan ücümni red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
