İmam Dlâver Halilov malümat bermesi ve Rusiye Memuriy cinayetler kodeksiniñ 5.26 maddesiniñ 4-ünci qısmına istinaden (qanunsız missionerlik faaliyeti) memuriy cinayet qararını teslim alması içün Qırımnıñ İçki rayonı Rusiye prokuraturasına davet etildi. Bu aqta advokat Emil Kurbedinov «Qırım birdemligi» faallerine bildirdi.
Dlâver Halilov rusça pek yahşı bilmegeni içün advokat terciman berilüvi aqqında muracaatta bulundı. Prokuraturada baqıluv başqa vaqıtqa qaldırıldı, terciman ricası qabul etildi.
«Bugün imamnıñ ricasınen İçki rayonınıñ prokuraturasına keldik. Halilov Dlâver – yerli cami imamıdır. Qırımda bu tendentsiyanı köremiz: musulmanlar qanunsız missionerlik faaliyeti içün mesüliyetke çekile. İmam camide musulmanlar içün cuma hutbesini berse ve cuma namazını qıldırsa, angi missionerlik faaliyeti aqqında aytıla? Bu diniy sebeplerden ayırımdan başqa bir şey degil. Musulmanlarnı «doğru» ve «yañlışlarğa» bölmek, «doğru» musulmanlarnıñ bir yolbaşçısını belgilemek ve o, kimler ibadet etecek, islâm merasimlerini kimler keçirecek dep qarar alsın», – dep qayd etti Emil Kurbedinov.
Advokat bu malümatnı halqara organlarğa bermek niyeti aqqında bildirdi.
Kurbedinovnıñ tarif etkenine köre, advokatnıñ yarın diger davalarnıñ mahkemelerinde olacağı içün bergen yazma arizasına baqmadan, imam Halilovnıñ davasında protokol yarın tizilecek.
Daa evel Aluştanıñ Rusiye prokuraturası «Aluşta» din cemiyetiniñ imamı Yusuf Aşirovğa qarşı «qanunsız missionerlik faaliyeti» içün memuriy dava açtı.
Bundan evet Qırımnıñ Rusiye prokuraturası aqmescitli imam Rasim Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı. Rusiye kontrolindeki Aqmescitniñ Mirovoy mahkemesi imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi.
