Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi, dep bildire Qırım.Aqiqat mühbiri.
«Mahkeme qararını şikâyet etecekmiz, çünki bu qararnen razı degilmiz, onı bir taraflı, delilsiz dep sayamız. Mahkemede olğan malümat Rasim Dervişevniñ areketlerinde memuriy cinayet olmağanını köstere», – dep bildirdi Dervişevniñ advokatı Ayder Azamatov Qırım.Aqiqatqa.
Azamatovnıñ fikirince, bu «tam siyasiy dava» ola.
Mahkeme Dervişevniñ davası boyunca mütehassıs dinşınaslarnı sorğuğa çekti. Advokat Ayder Azamatovnıñ Qırım.Aqiqatqa bildirgenine köre, ekspertler Dervişevniñ areketlerinde «missionerlik faaliyetiniñ» alâmetleri bar olğanını tasdıqlap olamadı.
İmamnıñ areketlerine qıymet kesmek içün Rusiye prokuraturası davağa üç mütehassısnı celp etti. Dava malümatınen bağlı hulâsalarını dinşınas, felsefe ilimleri doktorı, Qırım Muhtar Cumhuriyetiniñ din işleri komitetiniñ sabıq reis muavini ve «Qırım islâmşınaslıq ilmiy merkeziniñ» sabıq yolbaşçısı Ayder Bulatov, islâmşınas, islâm ocası, Qırım akimiyeti kontrolindeki Qırım musulmanları diniy idaresiniñ vekili Emir-Asan Umerov ve Vernadskiy Qırım federal universitetiniñ dinşınaslıq kafedrasınıñ müdiri, felsefe ilimleri doktorı, pedagogika ilimleri namzeti Olga Griva taqdim ettiler.
Advokatnıñ aytqanına köre, Ayder Bulatov ve Emir-Asan Umerov dava malümatları esasında Rasim Dervişevniñ areketlerinde missionerlik faaliyeti barmı yoqmı «añlap olamadılar».
Olga Griva ise camide ibadet videosında ve fotoresimlerinde missionerlik faaliyetiniñ alâmetlerini kördi. Advokat onıñ islâm saasında bilgilerinden şübhele.
Yanvarniñ 14-nde Qırımnıñ Rusiye prokuraturası imam Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı.
Yanvarniñ 29-nda mütehassıs dinşınas ve şaatlar Rasim Dervişevniñ missionerlik faaliyeti aqqında malümatnı tasdıqlamadı.
Fevralniñ 17-nde prokuratura şaatı «ayatı ve sağlığı içün telüke bar dep», Rusiye kontrolindeki Aqmescitniñ Mirovoy mahkemesiniñ oturışuvına kelmedi.
