Link açıqlığı

Saatnıñ esas haberi

Aqmescitli imamnıñ davası: ekspertler «missionerlik» yapqanını tasdıqlap olamadı


Advokat Ayder Azamatov
Advokat Ayder Azamatov

Rusiye kontrolindeki Aqmescit Mirovoy mahkemesinde aqmescitli imam Rasim Dervişevniñ davası boyunca mütehassıs dinşınaslar sorğuğa çekildi. Advokat Ayder Azamatovnıñ Qırım.Aqiqatqa bildirgenine köre, ekspertler Dervişevniñ areketlerinde «missionerlik faaliyetiniñ» alâmetleri bar olğanını tasdıqlap olamadı.

«Bugün mahkemede mütehassıs dinşınaslar sorğuğa çekildi: bir mütehassıs Qırım federal universitetiniñ felsefe bölüginden ve ekincisi Qırım musulmanları diniy idaresinden davet etildi. QFUdan davet etilgen mütehassıs oca diplomını ve 72 saat devam etken ihtisaslı attestatsiyadan keçkenine dair şeadetnameni berdi. Yani onıñ dinşınaslıqnen alâqasını tasdıqlağan yekâne vesiqa bu. Prokuratura delil olaraq köstergen videoda Rasim Dervişevniñ bütün areketlerinde missionerlik faaliyeti bar, dep cevap berdi. 5 saniyelik videoda ve fotoresimlerde nege baqıp, bozuv alâmetlerini köre degen suallerimizge videoda Rasim Dervişevge oşağa kişi insanlarğa baqa, dep cevap berdi. Olar oña baqa ve ögünde Quran bar, – bu missionerlik faaliyetiniñ alâmeti ola», – dep tarif etti Azamatov.

Advokatnıñ bildirgenine köre, sorğu soñunda ekspertlerden iç birisi missionerlik faaliyetiniñ alâmetlerinen bağlı cevap bermedi.

«Sorğu soñunda birinci ekspert İslâm dininde mütehassıs olmağanını ayttı, aytqanları tek tahminleri ola dedi. Qırım musulmanları diniy idaresini temsil etken ekinci mütehassıs ise olğan video ve fotoresimlerge köre Rasim Dervişevniñ areketlerinde missionerlik faaliyeti barmı-yoqmı añlap olamay, dep ayttı», – dedi Azamatov.

Yanvarniñ 14-nde Qırımnıñ Rusiye prokuraturası imam Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı.

Yanvarniñ 29-nda mütehassıs dinşınas ve şaatlar Rasim Dervişevniñ missionerlik faaliyeti aqqında malümatnı tasdıqlamadı.

Fevralniñ 17-nde prokuratura şaatı «ayatı ve sağlığı içün telüke bar dep», Rusiye kontrolindeki Aqmescitniñ Mirovoy mahkemesiniñ oturışuvına kelmedi.

XS
SM
MD
LG