Aqmescitli imam Rasim Dervişevniñ davası boyunca şaat Rusiye kontrolindeki Aqmescitniñ Mirovoy mahkemesi oturışuvında sorav protokolında qayd etilgen malümatnı bermedi, dep bildirdi, dep haber ete Qırım.Aqiqat mühbiri.
Advokat Ayder Azamatovnıñ aytqanına köre, mütehassıs-dinşınas ve şaatlar Rasim Dervişevniñ missionerlik faaliyetinen oğraşqanını tasdıqlamadı.
«Şaat Celâlov bugün (yanvarniñ 29-nda – QA) mahkemede soravda qayd etilgen er şey yalan, er şey bam-başqa edi, dep ayttı. O, bu soravnı oqumayıp imzaladı. Soravda qayd etilgenlerni red etip, Dervişevniñ birini celp etkenini ya da missionerlik faaliyetinen oğraşqanını körmedi, dep ayttı. Diger şaatlar da buña oşağan malümat berip, bu binağa namaz qılmağa kelgenlerini ayttı, anda Dervişevniñ olıp olmağanı müim degil, olar islâm dinine köre namaz qılmaq kerekler», – dedi Ayder Azamatov.
Advokatnıñ aytqanına köre, mahkemede delillerniñ videoları baqılğan soñ mütehassıs-dinşınas Bulatov Dervişev tarafından uquq bozulğanını körmedi.
«Mahkeme salonında kösterilgen videonı baqqan mütehassıs Bulatov, bu video boyunca Dervişevniñ missionerlik faaliyetinen oğraşqanına dair hulâsa çıqarmağa mümkün degil, dep ayttı. Ve Dervişev missionerlik faaliyetinen oğraşıp olamaz, çünki anda olğan er kes musulman edi, dep qoştı – yani mütehassıs ilmiy noqtaiy nazardan qıymet kesti, Dervişevniñ areketlerinde missionerlik faaliyeti yoq», – dep qoştı Azamatov.
Ayder Azamatovnıñ aytqanına köre, prokuratura kelecek oturışuvğa diger mütehassıs-dinşınasnı ve daa evel qırımlı advokat ve faallerni Rusiyeniñ ekstremizm ile küreş qanunlarınıñ bozulmaycağı aqqında tenbilegen prokuror Valentin Çuprinanı davet etmege rica etti.
«Mence, şaatlarnıñ ve mütehassıs-dinşınasnıñ malümatından soñ prokuratura dava dağılğanını añladı, çünki üç şaattan ekisi Dervişevniñ missionerlik faaliyetinen oğraşqanını aytmadı, mütehassıs-dinşınasnıñ malümatı da uquq bozulğanını qayd etmedi, ve bunı is etken prokuratura Celâlovnı sorğuğa çekken FSB hadimini onı kerçekten sorğuğa çekkenini isbatlamaq içün ve prokuror Valentin Çuprinanı mahkemege davet etmege rica etip, sorğu bu şahıslarnıñ yanında keçirildi, dep bildirdi, men, elbette, buña qarşı çıqtım, çünki Çuprina dava malümatlarında qayd etilmey. Em de diger mütehassıs-dinşınasnı çağırmağa rica etti, çünki bugün Bulatov ihtisasını tasdıqlaycaq vesiqalarınıñ aslını mahkemege bermegen eken. Buña baqmadan, mahkeme Bulatovnı sorğuğa çekip, bilgilerinden şübhelenmedi», – dep qayd etti Ayder Azamatov.
Yanvarniñ 14-nde Qırımnıñ Rusiye prokuraturası imam Dervişevge qarşı memuriy dava açtı. Qararğa binaen, cuma vaazı ve namaz uquq bozuluvı oldı.
2019 senesi oktâbr ayında Rusiye kontrolindeki Qırımnıñ Mirovoy mahkemesi Şumhay (Zareçnoye) köyüniñ cami imamı Arsen Kantimirovğa qarşı memuriy davanı qapattı. O, qanunsız missionerlik faaliyetinde qabaatlanğan edi. Mahkeme qararına köre, dava memuriy mesüliyetke çeküv müddeti bitkeni içün toqtatıldı.
