Qırımnıñ Rusiye prokuraturası «qanunsız missionerlik faaliyetini keçirgeni içün» Aqmescit imamı Rasim Dervişevge qarşı memuriy dava açtı, dep bildire Qırım.Aqiqat mühbiri.
Qararğa köre, cuma namazını qıldıruv ve vaaz berüv uquqnı bozuv olaraq tanıldı.
«Cuma namazı vaqtında uquq qoruyıcı organlarınıñ hadimleri kelip, kamerağa video çıqardı ve Rasimni qanunsız missionerlik faaliyetini keçirgeninde qabaatladı. Memuriy tahqiqatnı başlatuv qararını Kiyev rayonınıñ prokuror muavini Andrey Gritsayçuk çıqardı», – dep tarif etti advokat Ayder Azamatov.
Advokatnıñ bildirgenine köre, imamğa «basqı yapıla».
«Yañlış tanıtuv ola, Rasim Dervişev namaz qıldırdı, onı ise missionerlik faaliyetinde qabaatlaylar. Qanunğa köre missionerlik faaliyeti ne olğanına baqılsa, namaz qıldıruvı missionerlik faaliyeti sayılmay. Mence, imamğa basqı yapacaq olalar», – dep qoştı Azamatov.
Qırım prokuraturası vaziyetni şimdilik izaatlamadı.
2019 senesi oktâbr ayında Rusiye kontrolindeki Qırımnıñ Mirovoy mahkemesi Şumhay (Zareçnoye) köyüniñ cami imamı Arsen Kantimirovğa qarşı memuriy davanı qapattı. O, qanunsız missionerlik faaliyetinde qabaatlanğan edi. Mahkeme qararına köre, dava memuriy mesüliyetke çeküv müddeti bitkeni içün toqtatıldı.
