Aluştanıñ Rusiye prokuraturası «Aluşta» din cemiyetiniñ imamı Yusuf Aşirovğa qarşı köstergen «qanunsız missionerlik faaliyeti» içün memuriy dava açtı. Bu aqta «Qırım birdemligi» cemaat teşkilâtı Facebookta bildire.
«Onı telefonnen prokuraturağa davet etip, bu davetniñ sebebini aytmadılar. Yusuf Aşirov kelgen soñ oña qarşı memuriy dava açılğanını ögrendi», – dep tarif etti advokat Lilâ Gemeci.
Onıñ aytqanına köre, qarar Yusufqa berildi, imayeci hızmetlerinden faydanlamaq aqqı ise bozuldı.
«Aşirov Yusuf onıñ areketlerini añlata bilecek dinşınasnı mütehassıs olaraq celp etmege talap etti. Prokuratura memuriy cinayetni 2019 senesi iyülniñ 25-nden saya, o künü Qırım cumhuriyetiniñ Yuqarı mahkemesi din cemiyetine qarşı memuriy dava açtı», – dep qayd etti Gemeci.
Onıñ bildirgenine köre, Aşirov resmiy şekilde qayd olğan cemiyet imamı ola, ve müminlerge vaaz etti, bu ise «qanunsız missionerlik faaliyeti» sayılmay, çünki böyle faaliyet diger din insanları ya da bu dinni kütmegenler arasında öz dinini yaymaqnen bağlı olmalı.
2019 senesi iyünniñ 10-nda keçirilgen tintüvlerden soñ «Aluşta» din cemiyetiniñ reisi Lenur Halilov ve teftiş komissiyasınıñ azası Ruslan Mesutov apiske alındı.
Rusiye FSBsi, tahqiqat tedbirleri 205.5 maddesine istinaden (terror teşkilâtınıñ faaliyetini teşkil etüv ya da iştirak etüv) keçirile ve «Hizb ut-Tahrir» din teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi Qırımda insanlarnıñ apiske alınuvına narazılıq bildirip, Rusiyege qarşı siyasiy, iqtisadiy ve sanktsion basaqını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
