Qırımlı Vitaliy Mehonoşin ve Alim Mamutov sentâbrniñ 4-nde Qırımdaki Rusiye FSBsiniñ binası ögünde toplaşqanları içün berilgen para cezalarına razı degiller. «Qırım birdemligi» cemaat birleşmesi bildirgenine köre, imayecileri memuriy protokollarnı «konveyer» dep adlandırdı.
Rusiye kontrolindeki Aqmescitniñ Kiyev rayon mahkemesi Aqmescit sakini Vitaliy Mehonoşinge qarşı qarar çıqardı, oña 15 biñ ruble para cezası berildi.
İmayecisi Sabri Talıpov mahkeme esnaslarını «qabaatlayıcı olacağı zaten berlli konveyer» dep adlandırdı.
«İç bir oturışuvda, iç birinde dava qapatılmadı. Qırımda yaşağan insanlar semetdeşlerini tüşünmesi, çıqmasın, bir-birine qoltutmasın dep para cezalarını bereler», – dep tüşüne imayeci.
Mahkeme oturışuvında imaye dava malümatlarında, hususan fotoresimlerde, şaatlıqlarda Vitaliy Mehonoşin yoq, dep qayd etti. Amma qadı qulaq asmayıp, erkekni qabaatlı dep tanıdı.
Bundan ğayrı, Kiyev rayon mahkemesi Alim Mamutovğa 10 biñ ruble para cezasını berdi. Cemaat imayecisi Lenur Seflayev bu qararnı müvekkiliniñ aq bozuluvı dep saya.
«Akimiyet hadimleri qanunlarını ürmet etmey, dep aytmaq mümkün, yani qabaatlamağa isteyler ve qabaatlaylar», – dep tefsir etti vaziyetni Seflayev.
İmaye, mahkeme oturışuvında qadı delillerge emiyet bermeyip, qabaatsızlıq prezumptsiyası aqqından marum etti, dep qayd etti.
«Dava belli edi, qadı iç bir delilge, iç bir sözge, iç bir şeyge qulaq asmadı. Meni qabaatlı tanıp, 10 biñ ruble para cezasını berdiler», – dep tarif etti Alim Mamutov.
Qırımda FSB binası ögünde insanlar tutuldı: neler oldı (+foto)
Daa evel berilgen malümatqa köre, Rusiye kontrolindeki Aqmescitniñ Kiyev rayon mahkemesi sentâbrniñ 17-nde sentâbrniñ 4-nde FSB idaresiniñ binası ögünde toplaşqanlarğa umumen 117 biñ rublelik para cezalarını berdi.
Mehonoşin ve Mamutov sentâbrniñ 4-nde Aqmescitte Rusiye FSBsi idaresiniñ binası ögünde diger faallernen beraber tutulğan edi. Rusiye quvetçileri tintüv keçirip, qırımtatar faallerini tuttı.
Rusiye polisi sentâbrniñ 4-nde Rusiye FSBsiniñ binası ögünde tutulğanlarğa qarşı 58 memuriy protokol tizdi.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
