Qırımlı aq qoruyıcı ve vatandaş jurnalisti İrına Danılovıç, 2026 senesi bütün lâqayt qalmağan insanlarnı cenk sebebinden Rusiye apishanelerinde bulunğan siyasiy mabüslerniñ taqdiri aqqında sualni daa sıq kötermege çağırdı. Aynı zamanda o, vatandaşlarnıñ azat etilmesi aqqında maddeni barışıq planınıñ diger maddelerinden "boşatmaq" kerek olğanını tüşüne. Bu aqta "Tribunal" Ukrayin aq qorçalayıcı telegram-kanalı qadınnıñ tuvğanlarına atıf etip bildire.
"Dünya Ukrayin balalarınıñ qaytarıluvı içün neler yapa bilecegini kösterdi. Amma şimdi bunda toqtamaq içün vaqıt yoq. Rusiye apishanelerine alıp ketilgen Ukrayin qadınları ve qartlarnı qaytarmaq içün ne yapa bilecegini köstermek vaqtı keldi", — dep bildirdi İrına Danıovıç. Onıñ qayd etkenine köre, insanlıq ve insan aqları birinci yerde olğan medeniy memleketler içün Ukrayinlerniñ Rusiye apishanelerinden azat etilmesi meselesi er angi muzakerelerden evel "aldın şart" statusında olmaq kerek.
Danılovıç oña qoltutqan ve Rusiye esirliginden tez vaqıtta azat etilmesi içün ğayret etken bütün insanlarğa ve teşkilâtlarğa minnetdarlığını bildirdi.
"Men toqtamağan baş ağrısınen yaşayım. Qulaqlarımda gürülti, sızğırıq ve çınqıltı bar. Bularnıñ episi, maña kelgen bir qaç mektüpke cevap bermek içün diqqatımnı celp etmege imkân bermey. Amma er bir samimiy sözüñizge ve farqlı memleketlerden kelgen onlarnen yabancılar tarafından qol tutuv duyğusına büyük qıymet kesem", — dep qayd etti aq qoruyıcı.
2022 senesi Qırımlı jurnalist ve aq qorçalayıcı İrına Danılovıçnı FSB hadimleri qaçırdı. Daa soñra onı patlayıcı maddeler saqlağanında qabaatladılar, tahqiqat izolâtorında ise otit hastalığı sebebinden uzun müddet tibbiy yardım kösterilmedi. Neticede faalniñ bir qulağı eşitmey, amma tedaviylenmey.
