Qırımlı adliyeci Aleksey Ladin advokat faaliyetinen oğraşmaq içün litsenziyasını coydı. Bu aqta o, "Suspilne"ge bildirdi.
"Müşterilerime kelgende, men olarnı qorçalamağa devam etecegim. Endi mahkemede olğan işler, men qorçalayıcı vazifesini becerecegim, advokatnen beraber. Men tahqiqatqa qoşulmaycağım", — dep qayd etti o ve litsenziyanı lâğu etmek qararınen razı olmağanını qayd etti.
Uquq qorçalayıcı "Tribunal" teşebbüsiniñ malümatına köre, lisenziyasız qaldırmaq içün oña qarşı "ekstremist timsallerini numayış etüv" ve "RF ordusını itibardan tüşürüv" davaları uydurılğan soñ mümkün oldı. Rusiye mahkemeleriniñ bu qararları intizam komissiyasınıñ hulâsalarınıñ temeli oldı.
Ladin Qırımda siyasiy mabüsler ve işğal etilgen topraqlardan Rusiye tarafından qaçırılğan ukrayinlerniñ işleri ile belli.
"Qırım birdemligi" qayd etkenine köre, bu siyasiy mabüsler ve arbiy esirlerni qorçalağan uquqiy dava içün Qırımda advokat statusından marum etilgen dörtünci adisedir.
"Bu, onıñ zenaat faaliyeti içün taqip etüv. Er kes Alekseyniñ, FSB iştirak etken, ekstremizm ve terrorizm ile bağlı maqalelerde qabaatlanğan insanlarnı qabaatlağan, yüksek sesli cinaiy davalarnıñ alıp barğanını bile. Al-azırda Ladin ukrayinalı esirlerni qorçalay", — dep bildirdi advokat Emil Kurbedinov.
Rusiye kontrolindeki Aqmescitniñ Kiyev rayon mahkemesi Aleksey Ladinni 45 biñ ruble para cezasına çarptırıp, 14 künge apiske aldı. Onıñ imayecisi, qırımlı advokat Emil Kurbedinov bu qararnı Rusiye tarafından teşkil etilgen Qırım Yuqarı mahkemesinde itiraz etti. Amma o, istinaf şikâyetini red etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
