26 iyül gecesi Qırımnıñ ğarbındaki Novofedorovka köyündeki "Saq" rusiye arbiy uçaq alanına yapılğan ücüm neticesinde cebe silâsı yoq etildi, eki rus askeri yaralandı. Bu aqta "ASTRA" telegram kanalı Rusiye Federatsiyası tarafından işğal etilgen Qırımnıñ acele yardım hızmetlerindeki menbalarğa atıf etip haber etti.
Haberge köre, ücüm ATACMS raketasınen yapılğan.
"Neticede, cenk silaları uruldı ve yanğın çıqtı. Eki asker yaralandı - olar parça yaralarını aldılar", — dep yaza ASTRA.
Bundan da ğayrı, telegram kanalınıñ menbaları bildirgenine köre, ATACMS raketası Qırımnıñ Saq rayonındaki Şelkoviçnoye köyünden 5 km uzaqlıqta Rusiye ava mudafaası yerleştirilgen yerge de urdı. Neticede radar montajı yoq etildi. ASTRA menbaları bildirgenine köre, 26 iyül gecesi bütün Qırımğa episi olıp dört ATACMS raketası atılğan, idda etile ki, ekisi urıp tüşürildi.
Rusiye arbiyleri ve Qırım akimiyeti bu haberlerni izaatlamay, Ukraina tarafı da bu ücüm aqqında şimdiilk bir şey bildirmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
