Rusiye iqtisadiyat inkişafı Nazirligi, “Qırımnı ileriletüv maqsatlı federal programması”nıñ (MFP) 2025 senesine qadar uzatmasını muzakere ete.Bunıñ aqqında Rusiye iqtisadiyatı naziriniñ muavini Sergey Nazarovnıñ sözlerinden Rusiye ve Qırım matbuatı bildire.
“Bugün programmanıñ 2025 yılınace uzatılması muzakere etile edi. Programmağa qoşulacaq daa bir qaç obyekt bar, olarnı ise tekrar teşkermek kerek. Bu - büyük maliyeviy obyektler. Aqyarda - Aqyar körfezinden köpür keçiti. Ve Aqyar naqliyat shemasını deñiştirgen rokada”, - dep yaza matbuat Nazarovnıñ sözlerinden.
Bildirilgenine köre, Qırımda MFP-na Qırım şimalindequrulacaq yol ve Aqmescitniñ şimal-şarq aylanma yolu kirsetile bile.
“MFP-nıñ uzatılması qoşma aqça berüvini talap ete. Aqça berüvi Aqyarda 70 milliard ruble, Qırımda ise 130 rublege qadar arttırıla bile”, -dep yaza matbuat Nazarovnıñ sözlerinden.
Qomşu Rusiye ükümeti 2022 senesine qadar “Qırımnı ileriletüv maqsatlı federal programması”na binaen onıñ finansirlevini arttırıvnen bağlı qararınen “yarımada memuriyetiniñ semeresiz olğanını köstermek istey”, dep bildirgen edi Yañ cemiyet institutı siyasiy-iqtisadiy tedqiqatlar merkeziniñ mudiri Vasiliy Koltaşov.
MEVZUĞA DAİR: «Qırım tilenci olmağa mahküm»: Rusiye yarımadanı ne maalgece bağmağa azır
Rusiye 2022 senesine qadar “Qırımnı ileriletüv maqsatlı federal programması”nı uzattı ve oña ayırılacaq miqdarnı 40 mlrd. rublegece arttırdı.
İyülniñ 30-nda Rusiye ükümetiniñ başı Dmitriy Medvedev Aqyarda Qırımnıñ ictimaiy-iqtisadiy inkişafı boyunca toplaşuv ötkerdi. İşbu toplaşuv esnasında Rusiye İqtisadiy inkişaf nazirliginiñ başı Maksim Oreşkin beş yılğa qararlaştırılğan “Qırım ve Aqyarnı ileriletüv maqsatlı federal programması”nı daa eki yılğa uzataraq, finansirlevini arttırmağa teklif etti.
İyül ayınıñ başında Qırımnıñ rusiyeli yolbaşçısı Sergey Aksönov Rusiyeniñ FMP obyektleriniñ vaqtında teslim etilmeme sebeplerini izaatlayaraq, obyektlerni nezaret etken memurlarınıñ kompetensizligi, qurucılıq yapqan tış icracılarnıñ namussızlığından olğanından dolayı qabaatlı olğanlarğa nisbeten “radikal çareler” körüleceginen qorquzğan edi.
