Qomşu Rusiye ükümeti 2022 senesine qadar “Qırımnı ileriletüv maqsatlı federal programması”na binaen onıñ finansirlevini arttırıvnen bağlı qararınen “yarımada memuriyetiniñ semeresiz olğanını köstermek istey”.
Bu fikirni sentâbrniñ 12-nde Qırım.Aqiqat Radiosı efirinde Yañ cemiyet institutı siyasiy-iqtisadiy tedqiqatlar merkeziniñ mudiri Vasiliy Koltaşov bildirdi.
“Qırım ealisi, hususan belki de, Aqyar ealisi içün onıñ (semeresiz olğanını –QA) olğanını köstermek. Niyetleri yerli idareciler baş etip olamağanını, bürokratik sistema deñişmek, temizlenmek kerek olğanını köstermekten ibaret. Anda Ukraina devrinde “tanışlıq” vastasınen işke kigenler çalışa. Qırımnen bağlı vaziyette federal merkez para bergenini köstermekten ibaret. Çoq para berile bile, Qırım pek tez inkişaf ete bile, ancaq bu yolda – yerli memurlar sıfatındaki ciddiy sedler olğanını köstermek isteyler”, - dey Koltaşov.
MEVZUĞA DAİR: «Qırım tilenci olmağa mahküm»: Rusiye yarımadanı ne maalgece bağmağa azır
Rusiye 2022 senesine qadar “Qırımnı ileriletüv maqsatlı federal programması”nı uzattı ve oña ayırılacaq miqdarnı 40 mlrd. rublegece arttırdı.
İyülniñ 30-nda Rusiye ükümetiniñ başı Dmitriy Medvedev Aqyarda Qırımnıñ ictimaiy-iqtisadiy inkişafı boyunca toplaşuv ötkerdi. İşbu toplaşuv esnasında Rusiye İqtisadiy inkişaf nazirliginiñ başı Maksim Oreşkin beş yılğa qararlaştırılğan “Qırım ve Aqyarnı ileriletüv maqsatlı federal programması”nı daa eki yılğa uzataraq, finansirlevini arttırmağa teklif etti.
İyül ayınıñ başında Qırımnıñ rusiyeli yolbaşçısı Sergey Aksönov Rusiyeniñ FMP obyektleriniñ vaqtında teslim etilmeme sebeplerini izaatlayaraq, obyektlerni nezaret etken memurlarınıñ kompetensizligi, qurucılıq yapqan tış icracılarnıñ namussızlığından olğanından dolayı qabaatlı olğanlarğa nisbeten “radikal çareler” körüleceginen qorquzğan edi.
