Leningradnıñ faşist blikadasından tam azat olma künü yanvarniñ 27-sinde Rusiye arbiy şüreti künü kibi qayd etile. Bu munasebet ile Keriç "Blokada ötmegi" bütünrusiye aktsiyasına qoşuldı, yerli medeniyet işçileri ise bu aktsiyanı şeerniñ bütün müessiseleri, kitaphanelerine ve medeniyet merkezine yaydırdı. Anda "blokada ötmegi"ni numayış etken teartleştirilgen (!) beyanname tarqatma noqtaları yaratılacaq. Bu aktsiyağa yerli ötmek zavodını celp etip, yazıcı ve asker Daniil Graninniñ kitaplarında tarif etilgen ötmeklerni pişirip, tarqatmağanları taaciplidir.
Rusiyede facianı eglence merasimine çevirmege ustalıqnen bileler. Böylece Keriçniñ azat etüvi kününi de Rusiyede o qadar büyük bayram etmek mümkün, ve, misal içün, oquv yurtlarında ve kitaphanelerde Acı Muşqay taş ocağınıñ maketlerini tiklep, qoruyıcılar yapqanı kibi, seyircilerge de taşlardan dane-dane suv tamçılarını içtirmek. Ya da Yañı yıl bayramından qalğan fişenklerni ataraq, quyulardan suv aluv yarışını yapmaq mümkün. Aqaretlev, dersizmi?! Mana ve maiyetine köre - ebet, amma ğalebeniñ 75 yıllığı arefesinde teklifimni aqılsızlıq ya da mısqıl saymaz edim, çünki mayısnıñ 9-ınace mefküreci ve "Yekâne Rusiye" tarafdarlarınıñ fikir etüvi o qadar büyük ğayret ile çalışacaq ki, Georgiy şeritleri sadece qadın çantalarında degil olacaq, maşnalarnı bezetirler, vatanperver mevzusına bedava tatu yapmasını da teşkil eterler.
Abidelerge çiçek qoyuvı, meşal yürüşi, arbiy tarihiy oqumaları, arbiy vatanperver festivaller ve rekonstruktsiyalar mefküreviy kütleviylikni teşkil etmek içün artıq yeterli degil. Voronejden Keriçke "Desantçılar birligi" tarafından teşkil etilgen "Ğalebe yürüşi" çıqa, o, Rostov-na-Donu, Krasnodar ve Novorossiyskten 1200 kilometni keçecek. Rusiye Arbiy Desant Ordularınıñ komandalığı bu yürüşte Novorossiysk ava desant diviziyasınıñ ve Râzan desantçılar oquv yurtunıñ ansamblniñ iştirak etmesine ruhset berse, Keriç sakinleri el-elge uruşnı, tolanıñ başnen qırmaşını ve "Qanatlı piyade askerler"niñ türkülerini eşitecek ve körecek.
Rusiyede facianı eglence merasimine çevirmege ustalıqnen bileler
Amma şimdilik şeer merasimlerni öz küçünen becere. "Yekâne Rusiye" hadimleri olğan sırf şubalı qadınlarnıñ daa sovet vaqtından qalğan kölmeklerni ve şallarnı kiygen qartiylernen suretleri içtimaiy ağlarda çoq köründi. Bu partiya hanımları veteranlarğa "Yekâne Rusiye" yazılı paletlerni bere edi, qartlarnıñ bazıları olarnı elinde tutmaq bile küçü qalmadı - onıñ içün töşek yanında qaldırğanlar, anda da esabat içün suretler çekildi. Bu bütün Rusiye olğan partiya motı eken - beklenilgen ğalebeniñ 75 yıllığı bayramı cebecilerniñ ve emekçilernin evlerine evelce kele. Partiya reberleri, sağ qalğan veteranlarnıñ kimerleri mayısnıñ 9-ınace yaşamaz, dep qorqadırlar., böyle ise qartlarnen laf eterler, bahşış bağışlarlar vesselâm, partiya ve halq beraberdir, dep saymaq mümkün.
Keriç yetekçileri Rusiye Ğalebe bayramını içün özüne yüksek mecburiyetni alğan. Olar Sovet Birliginiñ Qaramanları hatırasına hatıra levhalarını tikleycek oldı ve atta - ne büyük quvançtır - Sovet Birliginiñ Qaramanlarınıñ adları berilgen soqaqlarnıñ alına ayrı diqqat etecek ola.
Şeer şurasınıñ oturışları ise endi tek şeer meseleleriniñ çezilmesi içün degil keçirile, anda büyük vatanperver duyğusı bar. Er deputat oturışında, şeer şurasınıñ reisi Maya Hujina aytıp bergeni kibi, Keriçniñ azat etilmesinde iştirak etken 146 Sovet Birliginiñ Qaramanınen tanış olalar ve hatıralarına sayğı köstereler.
Daa yaqınlarda sanalaştırmanen tek tarih ve medeniyet qoruğınıñ baş müdiri Tatyana Umrihina oğraşsa (onıñ reberliginde qadimiy Çar qurğanda defn etilgenler bile canlandırıla edi), şimdi şeerniñ iş çevreleri de buña berile, ve ğalebe yıllığına sanalaştırmalar - blokada ötmegininiñ numayışından başlap, cebeciler ve cebe arqası emekçilerinen suret yapmasına qadar - norma olıp qala .
Andrey Furdik, qırımlı, bloger
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
