Nizamlı bayram, tüzgün diktsiyalı ve mahsus tasilli animatorlar, doğru renkli üfürikler ve qoruqta pasta. Yarımadada rusiyeli Ğalebe kününi nasıl qutlaycaqlar - bizim maqalemizde.
Yıl yıldan Ekinci cian cenki aqqında hatıra yarımadada esasen Rusiye arbiy tehnikası ve kontsertlernen bağlı olıp qala. Keçken yıl Yaltada, misal içün, bu sebep ile atta diskoteka yapıldı. Bu yıl anane devam etecek - Ğalebe kününe bağışlap oynaylar, yırlaylar ve salüt yapalar. Ümümen, yarımada şeerlerinde bayram programması ucuzğa çıqmadı, amma onda bazı yañılıqlar da peyda oldı.
“Ğalebe diktantı”
Ğalebe künü arefesinde qırımlılar icün ilk sefer “Ğalebe diktantı” rusiye aktsiyasını keçirdiler. İlk olaraq, onda büyük Rusiye memurları iştirak etti.
Rusiye nezaretindeki Qırım Tasil, ilim ve gençlerNazirliginiñ malümatına köre, diktant 20 sualden ibaret edi, olarnı Rusiye devlet gumanitar universitet işlep çıqardı. Vazifeler cenk tarihi, onıñ qaramanları ve “Ğalebe künü”nen bağlı edi.
Qırımda “Ğalebe diktantı”nı yazmağa bütün istegenlerniñ imkânı oldı, bunıñ içün üç merkez çalıştı: Aqmescitte - V.İ.Vernadskiy adına Qırım federal universitet, Keriçte - “Mektep - Deñiz tehnikiy litseyi”, Kefede - Merkeziy kitaphane. Onıñ yekünlerini Rusiye Kününe, yani iyün 12-sine qadar çıqarılacaq olalar.
“Ğalebe” turizmi
Ğalebe kününi Qırımda faal şekilde ticaretleştireler. Misal içün, bu yıl yerli turistik şirketler, bu tarihlerde bir qaç künlük mahsus turistik turlarnı teklif ete. Mayıs 9-ı arefesinde keçirilgen turlarda Aqyarnıñ cenk şüreti yerlerini kezinmege teklif eteler, şu cümleden deñizden Aqyar körfezini ziyaret etip, arbiy gemilerni, Mihaylovskaya batareya ve Konstantinovskogo ralelinni seyir etmege. Mayısnıñ 9-ında turistlerge Ğalebe parkını ziyaret etip, şeerde bayram merasimlerine qoşulmağa teklif eteler.
Bundan soñ ertesi künleri tur iştirakçilerine Aqyarnıñ Sapun dağını, Dioramanı, Malahov qurğanını ve “Aqyar mudafaası” Panoramasını ziyaret etmege teklif eteler. Bundan soñ ekskursiyalar Qırımnıñ cenübine avuşa. Ekskursiyalarnıñ episiniñ vatanperver adları bar: “Aqyar - rus şan-şüreti şeeri”, “Ömür - Vatanğa, namus - kimsege” ve ilâhre. Yedi künlük turlarnıñ fiyatları adamğa 8,5 biñ rubleden başlana.
Rusiye turistik şirketleri, Aqyar, Balıqlava ve Bağçasarayda dört künlük ekskursiyalarnı da teklif ete, olarnıñ fiyatı 11 biñ rubleden başlana (ekskursiya kiriş ücretisiz), bu fiyatqa qomşu Rusiyeden yol ücreti de kire.
“Oyunlar, “yıldızlar”, Putin
Bu yıl, evelkisi kibi, mayıs 9 merasimleriniñ çoqusı Aqyarda keçecek. Adet olğan arbiy paraddan ğayrı, Ğalebe künü şerefine oynap da bererler. Primorskiy bulvar yalısında “Ğalebe içün soñunace oyna!” şeer oyun fleşmobı keçecek. Aktsiya iştirakçiler oyunnen Ekinci cian cenki qaramanlarını şeref etecek.
Aqşam şeerniñ baş meydanında Rusiye estradasınıñ sanatçiları çıqışta bulunacaq - Diana Gurtskaya, Aleksey Glızin, “Kombinatsiya” taqımı ve başqalar. Tedbirler saat 21:30-da Aqyar körfeziniñ suvları üzerinde atılğan salüt ve fişenklernen yekünlenecek.
Aqmescitte de Ğalebe kününe bağışlanğan merasimler az olmaycaq. Adet üzre, mayıs 9-ında saba şeerlilerge şeer merkezinde Rusiye prezidenti Vladimir Putinniñ rusiyelilerge hitabı yayınlanacaq. Bundan soñ “Ölümsiz polk” yürüşi başlanacaq. Aqşam aqmescitlilerni kontsert ve fişenk bekley.
Aqmescit rayonınıñ Sarabuz qasabasında keçken yıl mayısnıñ 9-ında Rusiye sanatçısı Stas Pyeha çıqış yaptı. Bu yıl ise bayram “kelme yıldızlarsız” keçecek, onı yerli istidatlar yaraştıracaq.
Cenk türküleri, animatorlar,bayram renklerinde üfürikler
Qarasuvbazarda Ğalebe künü bayramına eñ azından 400 biñ ruble masraf etecek olalar. Rusiye nezaretindeki yerli memuriyet, mayıs 9 tedbirleriniñ keçirilüvi içün böyle fiyat töledi. Kontraktqa köre, bu aqçağa şeer, üç saatlıq bayram programmasını satın aldı. Bu programmada yerli memurlar iştirak etecek. Bundan ğayrı, bir yırcı, halq ve estrada taqımları olmalı, ve eñ azından beş animatordan ibaret olğan oyun programması.
Kencelerge silâ: Qırımda balalarnı cenkke nasıl ögreteler (süret toplamı)
Merasim alıp barıcısına ayrı talaplar bar, onıñ tüzgün diktsiyası ve ihtisaslı sesi olmalı. Bundan ğayrı, memuriyet sana yaraştırmasını da ayrı beldiledi: sana üfürik girlândasınen donatılmaq kerek, üfüriklerniñ renkleri merasim mevzusına uymalı: qaverenki ve sarı ya da qara ve portaqal tüste.