Qırımdaki "Taygan" arslan parkı sadece arslanlarınen degil, bitmegen davalarınen de belli. Soñki vaqıtlarğa qadar "Taygan"nıñ saibi Oleg Zubkovdanıñ Sergey Aksonov ile altı yıllıq qavğası oldı. Amma mına endi mesele çezildi, "Taygan"nıñ başına yañı belâ keldi - koronavirus ve yem qıtlığı.
Oleg Zubkovnıñ çoq istidatı bar ve olardan birisi - problemalarına cemiyetniñ diqqatını çekmek qabiliyetidir. Sergey Aksönovnen çatışma yıllarında, esasen ayvanlarnı sevgenlerniñ arasından o biñlerce tarafdar taptı. Zubkovnıñ Qırım akimiyetinen davasında esas rolni oynağan tamam cemaat oldı.
Zubkovnı desteklegen bir sıra narazılıqlardan soñ Rusiye İqtisadiyat İnkişafı Nazirligi "Taygan" parkınıñ meselelerini çezecek üç taraflı "yol haritası" añlaşmasını teklif etti. Neticede "Taygan" reberleri, Qırımnıñ rusiyeli ükümeti ve Rusiye İqtisadiyat İnkişafı Nazirligi vekilleri imzalağan gizli vesiqa peyda oldı.
"Yol haritası" peyda olğanından soñ, Zubkovnıñ işleri tez tüzelip başladı. Yıllarnen çezilmegen meseleler çezilip başladı: Rusiye akimiyeti birden "Taygan" ve "Skazka" parklarınıñ topraqlarını resmiyleştirdi, meşur park arifleriniñ bozmasını lâğu etti. Bir zurafe, ayuv ve atta qaplanlar bağçasınıñ qurulması içün bile "Taygan"nıñ etrafında 50 gektarlıq topraqnıñ ayırılması aqqında laf oldı. İşte, planlar büyük edi, amma koronavirus olarnı bozdı.
Oleg Zubkovnıñ aytqanına köre, o aktivleriniñ çoqusını Portugaliyağa keçirdi, anda onıñ turistik ve qurulış biznesleri bar. Qalğan aqçalarnı, artıq beş aylıq çalışmağan "Taygan" parkınıñ keliri olmağanı içün, onıñ ayvanlarınıñ yemine masraf etti.
İçtimaiy ağlarda Zubkovnıñ tarafdarları ve sadece ayvanseverler, Zubkovnıñ blogında belgilengen rekvizitlerge para yollay
Şimdi cemaat yañıdan qasevetlenip başlay. İçtimaiy ağlarda Zubkovnıñ tarafdarları ve sadece ayvanseverler, Zubkovnıñ blogında belgilengen rekvizitlerge para yollay. Taacipli, amma kapiklerini sayğan pensionerler bile "Taygan" ayvanlarına yardım etmek içün aqçalarını yollay. Soñra özleri tefsirlerde şaqalaşa - daa qaysı bir millionerge pensionerler aqça toplar?! Bu fenomenni nasıl añlatmaq mümkün?
Çoqusı çetelden bile para yollamağa azır. Zubkovnıñ qadını PayPal internet kisesini qayd etti, ve YouTubedaki tefsirlerge köre, kiseniñ limitleri birinci künde toldı!
Zubkovnıñ aytqanına köre, bütün bular yaedım ete, amma meseleni çezmey - bir qaç biñlik kiyik ayvanlarnıñ sürüsini aşatmaq içün pek çoq aqça kerek. bundan da ğayrı, aqça olsa bile, şimdilik yemni satın almağa qolay degil. Rusiyeden et teminatı şimdi yoq. Qırımnıñ özünde de mahsulat strategik mal olıp qala.
Endi top Sergey Aksönovnıñ qolunda - Zubkovnıñ parklarına yardım etermi ya da evelki hoşnutsızlığı yeñermi?
Şimdi faaller Oleg Zubkovnıñ parklarına Qırım tükânlarından bozulgan etler temin etilsin dep Rusiye akimiyetine muracaat etti. Buña cevap olaraq ise - Rusiye içtimaiy teşebbüs saytında muracaatnı yerleştirmek tevsiyesini aldılar. O muracaat 100 biñ imza toplasa, soñra Devlet Duması, belki de, bir qarar alır.
İşte, Oleg Zubkovnıñ qasevetli hocalığı kene ağır vaziyette. Qızğın tavadan ateşke, degen dayın. O öz blogunda endi bildirdi ki, toplamınıñ sayısını azlaştırmaq mecruriyetinde qala bile. Endi top Sergey Aksönovnıñ qolunda - Zubkovnıñ parklarına yardım etermi ya da evelki hoşnutsızlığı yeñermi? Sual bundadır...
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
