Link açıqlığı

Saatnıñ esas haberi

Qırımlılarnıñ mektüpleri: Qırımnıñ baar mevsimini virus bozdı


Kefedeki tükân ilânı
Kefedeki tükân ilânı

Aqmescit ava limanı martnıñ 31-nde şunı bildirdi: aprel ayında Qırımda yolcularnıñ sayısı keçken senege köre 60% eksilecek. Yazda ise ne olacaq?

Keriç köprü daa beter. Al-azırda köpürden keçken maşinalarnıñ sayısı 2,5 qat eksildi. Bu, Qırımnıñ Rusiye ükümetiniñ baş nazir muavini Yuliya Jukovanıñ resmiy maruzasıdır.

Onıñ qayd etkenine köre, «nasıl olsa da, köpürde areket şimdilik devam ete». Yani bu areket toqtatıla bile kibi bir şübhesi barmı? Jukovanıñ aytqanına köre, qırımlılar uzaq mesafeli tren biletlerini teslim etip başladı. Onıñ bildirgenine köre, martnıñ 28-nde 96 bilet qaytarıldı. Amma bunı teşkermek mümkün.

Rusiyeden Qırımğa ve keri taşığan tren yolunıñ saytı bar. Anda bilet ayırtmaqnen beraber qaç bilet qalğanını baqmaq mümkün.

Bir afta evelsi Moskvadan Aqmescitke ketken trenge, meselâ, aprelniñ 3-nde 458 boş küpe yeri bar edi. Martnıñ 30-nda olarnıñ sayısı 634 oldı, martnıñ 31-nde – 658. Kelecek turistler biletlerni toqtamayıp qaytara, ğaliba. Bir afta içinde tek bu künniñ 200 bileti sıfırlandı. Ya da aprelniñ 7-nde olacaq tren biletleri: bir afta evelsi 603 yer boş edi, martnıñ 31-nde 657 yer boş oldı.

Yani bu güzel eki qatlı trenler boş kete.

Yoq, mayıs bayramları o qadar acınıqlı degil.

Meselâ, aprelniñ 29-na 59 boş küpe yeri bar (bir künde tek 10 bilet teslim etildi).

Amma turistlerni añlamaq da mümkün: Qırımdaki musafirhaneler qapatıldı. Daa bir-eki kün evelsi Kefeniñ eñ yahşı musafirhanelerinden biri olğan «Alıye parusa» otelinde yer ayırtmağa imkânıñız bar edi. Artıq yoq, çünki otel tek hızmet yolculıqlarında olğanlarnı qabul ete. «Lidiya» musafirhanesi de aynı vaziyette.

Özleri qapanmağan otel ve musafirhanelerni ise yazğa qadar mecburen qapatalar. Ve para cezasını bereler.

Aqyar daa hucur: şeerniñ kirişlerinde blokpostlar qoyuldı, maşinalar toqtatıla, anketalarnı toldurtalar, sıcaq baqalar.

Qırım sakinleri içün de quvançlı – şeerlerara avtobuslarnıñ sayısı qısqartıla. Kezlevde ise tramvay areketi toqtatıldı – virus ücüm ete. Ve Qırım sakinleri alışmağa tırışqanda azıq malları da paalılaşqan eken.

Şimdi ise qısqadan:

  • Aphanelerde maskalar yoq. İç yoq – bir yerde ve bir vaqıt yoq. Qırım reberligi maskalar belediye aphanelerinde bar, dep ayta, amma bular tek hastahanelerdeki aphaneler ve tibbiy müessisege kelseñ berile (bir insanğa bir maska);

Sanitayzerler de bir yerde yoq. Bir afta evelsi bir-eki dane tesadufen alıp oldım;

Kefede tükân, qave, berberhane ve diger müessiseler qapatıldı
Kefede tükân, qave, berberhane ve diger müessiseler qapatıldı
  • ​Tükânlarnıñ ekseriyeti qapatıldı, balalar tatilde, bala bağçaları qapalı. Kinoteatr, müzey, qaveler çalışmay. Halq ise yalıda quvanıp keze, sailde bir şeyler içe;
  • Qırımda turistik mevsim olmasa, ne olacağını añlağan kişi pek az. Qaç insan işsiz qalır? Mallar ne qadar paalılaşacaq? Bu suallerniñ cevaplarını daa soñra bilecekmiz.

Armen Haçaturov, kefeli bloger (müellifniñ adı ve soyadı telükesizlik maqsadınen deñiştirildi)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG