Qırımda koronavirus pandemiyasınen bağlı karantin tedbirleriniñ küçleştirmesini devam eteler. Yarımadanıñ rusiyeli akimiyeti, aprelniñ 3-ünden 6-sınace tam özüni izolâtsiya etüv rejimi kirsetilgenini ilân etti. Qırımnıñ rusiyeli başı Sergey Aksönov, bu, yarımadada kütleviy infektsiya olmasında vazgeçmek içün yapılğanını ayta.
Bu rejim altında bütün şeerara avtobuslar lâğu etildi, şeer içinde saba ve aqşam ekişer saat çalışalar. 65 yaşından büyük adamlarğa evlerinden 100 metrden çoq mesafege çıqmağa yasaq, qalğanlarına sadece tükân ve ilâchanege barmağa izin berile. Buña daa dayanmaq mümkün, amma aynı vaqıtta işten çıqaruvlar başlandı, adamlar paralarını coya. Körüngeni kibi, Qırım karantini uzanacaq.
Aprelniñ 2-sinde koronavirusnen küreş ştabınıñ oturışında Qırım parlamentiniñ spikeri Vladimir Konstantinov adamlarnıñ aqçasız qalğanını tanıdı. Amma bir qaç büyük inşaat şirketinde payı olğan spiker, Federal Maqsatlı Programmanıñ obyektlerini qurıp bitirmege kerek dep, qurucılıq şirketleriniñ işiniñ devam ettirmesini talap ete edi.
Ne deyim, adamlar raatsızlana. Rusiye Anayasasına köre, er adamnıñ yürmege ve çalışmağa aqqı bar. Ve yalıñız komendant saatlarınen fevqulâde vaziyet rejimi böyle sıñırlayıcı tedbirlerni kirsetmege imkân bere. Amma olar onı ilân etmey. Bilesizmi ne içün? Çünki fevqulâde vaziyet rejiminde ealiniñ kerekli mal, ilâc ve ilâhre seylernen teminatını devlet becermeli. Amma körüne ki, Rusiye reberligi bu vazifelerni öz başına almağa istemeyip, adamlarnıñ özüne qaldıra. Amma mında başqa sual: kelir olmağan vaqıtta iş adamları ne etip aylıq, kira ve başqa ödevlerni tölesin? Ya işsiz qalğan qırımlılar qorantalarını nenen aşatsın?
Qıta Ukrainadan erzaq olmaycaq, Rusiyeniñ Krasnodar ülkesi ise karantin sebebinden qapatıla. Neticede Qırım izolâtsiyada qala
Adamlar atta havuç ve soğannıñ fiyatları öskenini raatsızlıqnen közete. Mesele em de ondan ibarettir ki, operativ ştabnıñ esabatlarına köre, erzaq yedekleri o qadar da çoq degil qala, amma soñra ne olacaq? Operativ ştabınıñ oturışında, vaziyet nezaret altında dep ayttılar. Buña inanmaq qıyın, çünki qıta Ukrainadan erzaq olmaycaq, Rusiyeniñ Krasnodar ülkesi ise karantin sebebinden qapatıla. Neticede Qırım izolâtsiyada qala, ya da şimdi aytılğanı kibi - özüni izolâtsiya ete. Amma Qırımda az şey istisal etilgenini köz ögüne alsaq, perspektivalarımız pek parlaq da degil. Amma bunıñ da bir hayırı bar - niayet tükânlarda ötmeklerni paketlep başladılar. Daa bir afta evel olar alıcılarnıñ tiymeleri, qoqumaları ve aqsırıqlarından qorunmayıp tura edi.
Suv meselesi aqqında da unutmayıq. Mart keçip ketti - bir yaracaq yağmur olmadı. Suv anbarları yarı quru. Budır qırımlılar içün daa başqa bir potentsial sınav
Bundan ğayrı, Rusiyeniñ 2020 senesine büdjeti cermay barreli içün 40 dollar fiyatını közde tutıp tizilgen, amma şimdi o eki kere ucuzca. Onıñ içün yaqınlarda, ğaliba, aylıq ve pensiyalarnıñ keç qalması başlanacaq.
Vaziyet pek kergindir. Telâşnı arttırmağa istemeyim, onıñ içün satırlarnı "bilgen - azırlanğan" baqımından oqumañıznı rica etem. Bu menim tahminiy fikrimdir, farzlarım kerçekleşmese, quvanırım. Aytılğanı kibi, yahşılıqqa ümüt etip, yaramaylıqqa azırlanamız.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
