Link açıqlığı

Saatnıñ esas haberi

Qırım biznesi içün sopa ve havuç yufaqları


Mahsus Qırım.Aqiqat içün

Koronavirus pandemiyasından sebep sadece esli-başlılar ve zayıf immuniteti olğanlar degil, aynı zamanda küçük biznes vekilleri de telükeli vaziyetke oğradı. Böyle dep, turistik yerlerge, erzaq mallarını satmağan tükânlarğa ve çeşit-türlü hızmetlerge qarşı Qırımnıñ rusiyeli akimiyetiniñ sıñırlavlarınıñ kirsetilmesini tefsir etip, olarnıñ özleri qasevetli bir şaqa ete. Memurlar, Qırım iş adamları karantinden pek zarar körmesin dep bir şey yaptımı?

Çalışma, amma töle

Martnıñ 17-sinde yarımadada yüksek azırlıq rejimi ilân etildi, oña köre koronavirus pandemiyasından sebep vatandaşlar ve teşkilâtlar içün bir sıra yasaqlar kirsetildi. Hususan, martnıñ 28-iden aprelniñ 6-sınace bütün satış noqtaları işini toqtatmaq kerek. Em de, aprelniñ 6-sında bu sıñırlavlar toqtatılacağına inanğan az adam bar.

Bundan ğayrı, istisal hatları, maden müessiseleri ve işleri ayat teminatınen bağlı olmağan müessiseler ve hızmetler belli olmagan müddetke işini toqtattı. Bütün turistik saa baarniñ soñunace toqtatıldı.

Rejimniñ bozuvı içün iş adamlarına büyük memuriy cöremeler ve 90 künlük faaliyetniñ toqtatuvı maküm etile bile, reber itaat etmese ise - onı on beş küngece tevqif ete bileler. Bundan ğayrı, buyruqqa köre, saipler işçilerine sıñırlayıcı tedbirlerniñ vaqtında aylıq tölemeli.

Onıñ yerine ne?

Qırım akimiyeti, biznesni viran etken areketler qarşılığı olaraq küçük biznesni desteklemek içün aslında mütenasip olmağan tedbirlerni teklif ete. Qırım başı Sergey Aksönovnıñ №75U emrine köre, bir kvartal içün sigorta ödemesi lâğu etildi, devlet mikrokreditleri deñişti ve cühhuriyet vüdjetine kira ödemesini şimdi degil, amma yılnıñ soñuna qadar tölemek imkânı. Yoq, daa "Qırım devlet biznes destegi fondu"nıñ acele hatına telefon etmek mümkün.

adaletli olmaq içün aytayım, bu tedbirlerniñ episine "ilk tedbirler" dediler, ondan soñ Qırım ükümeti biznesni desteklemek içün daa bir qaç teklifni işlep çıqardı. Amma bu deñişmeler büyük oldı demek zor.

"Destek" aletlerinden birisi, Qırım emek ve içtimaiy mudafaa nazirliginiñ tefsirlerine köre, müessise qapalı olğan vaqıtta işçilerniñ aylıqlarınıñ tölemesi oldı. Adam tiline tercime etseñ, Emek nazirligi, saip karantin devrinde işçilerine mecbutiy tatil berip, aylıqlarını tölemey bile ve oña bunıñ içün iç bir şey olmaz.

Ekinci haber Qırım kurort ve turizmi nazirliginden oldı, olar mayısnıñ 1-ince töllenmek kerek olğan ödevlerge bergi tatillerni bermede vade etti. Amma müessise bu tatil ne vaqıtqace sürecegini haber etmedi. Ve bu yañılıq sanatoriy ve bir sıra musafirhanelerge tarqalamay.

Fors-major yoq

Küçük biznesniñ saipleri olğan qırımlılar, bu tedbirlerde tek açuvlana. Ükümetniñ o qadar pek faydalı olmağan destek tedbirlerinde degil de, sıñırlav tedbirlerniñ keçke qalğanını ve küçük biznes içün olarnıñ aqibetleriniñ tüşünilmegenine açuvlanalar.

İrina, turistik şirkketniñ saibi: "Fevqulâde vaziyetni ilân etmege Aksönovğa ne keder etti? Kerçekten, aslında o bar, amma oña "yüksek azırlıq rejimi" dediler. Ve mına biz uçaq biletlerini lâğu etemiz, amma ava şirketleri paranı qaytarmay - bizde fors-major al yoq. Sadece akimiyet vaziyetnin fevqulâde olğanını evelce qabul etmege istemegeni içün!"

Qırım ticaret merkezinde qapalı tükânlar
Qırım ticaret merkezinde qapalı tükânlar

Roman, ticaret merkezinde satış noqtasını kirağa ala: "Mına men bir aftağa noqtamnı qapattım. Sanki bir aftağa, amma bir aftanen bitmeycegini er kes añlay da. Ertesi künü saip telefon etip, kelecek eki ay içün kira parasını tölemege talap ete. Em de koronavirustan evel olğan kölemde! Akimiyet ve deputatlar bunı qasevet etmey - bu ticaret merkezleriniñ saiplerine - olar çoq da degil: "Cemaat, adamlar işsiz olğange, bu ödemeleri toqtatsañız" deseler olacaq edi".

Oksana, manikür ustası: "Qırımğa kirgen adamlardan sıñırda eki aftalıq izolâtsiya kütmelerini ne içün talap etmediler? Karantinge ne içün yibermediler? Şu alda böyle sert sıñırlavlar kerek olmaz edi, er kes çalışqanı kibi çalışır edi. Şimdi ise, menimce, adamlar ep bir - qanunsız olsa bile - çalışmağa çareler qıdıracaq".

Soñki fikirniñ endi tasdıqı da bar. Daa evel haber etilgeni kibi, yasaqlarğa baqmadan, turmuş tehnikası supermarketleri çalışa, ükümette ise, bazı satıcılar bir sıra zazuriy mal qoyıp, bu manaçıqnen erzaq olmağan mallarnıñ satışını devam ete. Taaciplenmege şey yoq - Qırımdaki küçük biznes küçlü immunitetke saip.

XS
SM
MD
LG