Qırım ve Aqyardaki Rospotrebnadzor idaresiniñ yolbaşçısı Natalya Penkovskaya, yarımadağa keskin nefes virus yuqunçı çoq qayd etilgen qomşu Rusiye regionlarından kelecek insanlarnıñ koronavirus tedqiqi yapılacaq, dep bildirdi.
Bu aqta o, aprelniñ 2-nde koronavirus yuqunçına qarşı tedbirler operativ ştabınıñ toplaşuvında bildirdi.
«Rusiye regionlarından (eñ çoq hasta qayd etilgen – QA) keskin nefes virus yuqunçınen kelgen şahıslarnıñ yañı koronavirus yuqunçı talili yüz fayız yapılacaq», – dep qayd etti Penkovskaya.
Martnıñ 31-nde saba Rusiye kontrolindeki Qırım yolbaşçısı Sergey Aksenov koronavirus yuqunçına oğrağan ekinci yerli insan tasdıqlandı, dep bildirdi. Böylece, Qırımda 16 kişi qayd etildi. Olardan 14-ü kelgenlerde, ekisi – yerli. Aqyarda 5 kişi koronavirusnen hastalandı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Aprelniñ 1-nde aqşam Qırımda koronavirus yuqunçı tarqalğanından yañı sıñırlavlar ilân etildi. Rusiye kontrolindeki Qırım yolbaşçısı Sergey Aksenovnıñ aprelniñ 1-nde bildirgenine köre, Keriç köpründe blokpost qoyulacaq. Onıñ fikirince, koronavirus tarqaluv telükesi bar olğanından karantin tedbirleri daa bir aftağa uzatılacaq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
