Vladimir Putinniñ "Qırım mevzusı qapalı" degenine baqmadan, Qırım Rusiye siyasetcileri içün açıq ve tartışmalı bir tertiptir.
Rusiye siyasetine Qırımdan kelgenler meşur ve nufuzlı şahıs olmadılar. Sabıq prokuror Natalya Poklonskaya belli oldı, amma onıñ siyasiy tesiri pek az. Sesli ifadelerden ğayrı, o başqa bir şey çezip olamay. Rusiye Devlet Dumasınıñ Qırım mebusları Mihail Şeremet, Andrey Kozenko ve Konstantin Baharev asıl körünmeyler - ne Qırımda, ne Moskovada. Bunı añlamaq da mümkün, çünki Qırımnıñ rusiyeli başı Sergey Aksönov ve Qırımnıñ rusiyeli ükümetinin reisi Vladimir Konstantinov, Devlet Dumasına nazmet kösterüvni muzakere etkende, olarğa harizmatik raqip kerek degil fikrinde ekisi de bir olğandır.
Rusiye siyasetine Qırımdan kelgenler meşur ve nufuzlı şahıs olmadılar
Faaliyet köstergen yekâne siyasetçi - Ruslan Balbek. O bir şeylerni becergenini qayd etmelim, bu yıl taqımına Albert Kangiyevniñ celp etmesi endi büyük iş edi. Rusiye Dumasınıñ başqa qırımlı mebusına oşamayıp, o halqara seviyede de körünip tura, bir qac halqara meydançıqqa qoşuldı. Türk yöñelişinde irarlı çalışa. Mında onıñ esas vazifesi - 2020 senesinde Aqmescitte Büyük Cuma Camisiniñ açılışına itibarlı Türkiye vekillerini kelmege qandıruvdır.
Rusiye Federatsiya Şurasınıñ qırımlı azaları Sergey Tsekov ve Olga Kotividi de Rusiye siyasetiniñ parlaq şahıslarından birileri olmadı. Körünmeyler ve eşitilmeyler. İşte, tekrarlanayım, Aksönov ve Konstantinovğa Moskovaga yollanılğan tolusınen idare etilgen qırımlılar kerek. Onıñ içün bu qaramanlar Aksönovğa tamamınen uyğun körüne.
Duman partiyaları Qırımda zayıf bir şekilde çalışa. "Yedinaya Rossiya" ("Yekâne Rusiye") Qırımdaki rusiyeli icra akimiyetiniñ tübündedir, KPRF ve LDPR "Yedinaya Rossiya"nıñ tübündedir. Qırımlılar olarnıñ Aksönovnıñ namzeti içün ber berüvinden küle edi - kommunistler de, Jirinovskiyliler de bir olıp "Yedinaya Rossiya" namzetine qol tuta edi.
Aksönovğa qarşı keskin sürette laf etken Rusiye siyasetçisi - "Za novıy sotsializm" ("Yañı sotsializm içün") areketiniñ yetekçisi Nikolay Platoşkindir. Bu siyasetçi Qırımnı ziyaret etken edi, mında öz siyasiy küçüniñ yerli bölügini yarattı, onıñ başı yerli cemaatçı Boris Lurye oldı. Şimdi Platoşkin özüniñ sıq-sıq berilgen intervyülerinde, Qırım iş adamı Oleg Zubkovnıñ "Taygan" parklarına binaen Aksönovnıñ siyaretine qarşı keskin laflar ayta.
Mesele şunda ki, Qırım Rusiyege paalığa çıqa - ve, özüni "rus topraqlarını toplayıcısı" olaraq hayal etken Putinniñ geopolitik ambitsiyaları içün öz eyiallığı ve raatlığınen tölemege azır olmağan, sade rusiyelilerni bu ket-kete ziyadece raatsızlay
Rusiyeniñ şimdiki akimiyetiniñ basqa muhalefet partiyaları Qırımdan uzaq turmaga tırışa. Rusiye muhalefetçisi Aleksey Navalnıy, Qırımda onıñ vekilleri olmaycağını çoqtan ayttı. Misal içün "Yabloko" kibi demokratik firqalar Qırımnıñ "rusiyeli" statusına pek inanmay. Şimdi Moskovada bu siyasiy küçüniñ reytingleri arta ve onıñ Rusiye paytrahtınıñ çeşit-türlü seviyelerinde bayağı vekilleri bar. Bu "Qırımbizim"ler içün sesli bir çañdır, çünki belli ki, büyük siyaset paytahtlarda yapılır. "Yabloko" daa keñiş formatta akimiyetke kelse - Qırım meselesi keskin sürette qoyulacağınıñ ihtimalı büyük. Rusiye cemiyetinde bunıñ talabı pek tez ve keñiş öse.
Mesele şunda ki, Qırım Rusiyege paalığa çıqa - ve, özüni "rus topraqlarını toplayıcısı" olaraq hayal etken Putinniñ geopolitik ambitsiyaları içün öz eyiallığı ve raatlığınen tölemege azır olmağan, sade rusiyelilerni bu ket-kete ziyadece raatsızlay. Kremlniñ "Rus dünyası" propagandasına ayırılgan büyük aqçasına baqmadan, Rusiye içinde vatanperverlik mevzusı ep yaramayca çalışa. Yaşlar er şeyni köre ve anlay, yahşı ki er keste mustaqil menbaalar ile internet bar, bunıñ içün Moskovada ealiniñ hoşnutsızlığınıñ qaynav noqtası aşqanda, bir kün Rosgvardiyanı ve Kreml saiplerini basıp, adamlarnıñ aqını rejimni yıqmaycağında iç bir kefalet yoq.
Endi gipotetik tüşüneyik, bundan soñ ne olacaq? Büyük ihtimal ile Rusiye coğrafiya haritalarında kösterilgen şimdiki sıfatında saqlanılmaz... Er alda, büyük bir buhran, çalqantılar ve siyasiy elitalarnıñ deñişmesi olacaq.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
