Link açıqlığı

Saatnıñ esas haberi

Qırımlılarnıñ mektüpleri: Qırımtatarlar hainlikni afu etmey


Qırımdaki Rusiye saylavları
Qırımdaki Rusiye saylavları

Qırımtatar halqı birdemligi, birligi ve bir-birine köstergen desteginen belli. Halq temsiliy organları – Qırımtatar Milliy Meclisi ve Qurultayına – pek emiyet bere. Meclisniñ qararları ve tevsiyeleri er vaqıt halqnıñ areket reberi ola.

Al-azırda Qırımtatar Milliy Meclisiniñ esas çağıruvı – Qırımda Rusiye akimiyetiniñ repressiv rejimi altında bütün qıyınlıqlarğa baqmadan, Ukrainağa sadıq qalmaqtır. Amma Rusiyeniñ Qırım işğalinden beş yıl keçti. Ve qırımtatarlar arasında maneviy ceetten dayanamağan ve satqın olmağa qarar bergen insanlar oldı. Bu sentâbrniñ 8-nde keçirilgen Qırımnıñ Rusiye yerli şura saylavlarından soñ belli oldı.

Özüni Rusiyege qoltutqan qırımtatarlarnıñ (olarnıñ sayısı pek az) lideri olaraq tanıtqan Qırımnıñ Rusiye yolbaşçısınıñ sabıq muavini, Rusiye Devlet Dumasınıñ deputatı Ruslan Balbek 250-ge yaqın qırımtatarı Rusiye deputatı oldı, dep bildirdi. Faqat olarnıñ deputatlığı (Balbekniñ de öyle) dünyada tanılmay, amma onı bu pek qasevetlendirmey, ğaliba. Aman-aman episi saylavlarğa Rusiyeniñ «Yedinaya Rossiya» ükümran firqasından kete edi, amma namzetini özleri köstergenler bile «Yedinaya Rossiyağa» kirmege istegenini (er alda Balbek taqımınıñ basqısı altında) bildirdi.

«Yañı saylanğan 36 qırımtatar belediye deputatı «Yedinaya Rossiya» tarafdarı olacağına dair ariza berdi, yarım yıldan soñ ise olar firqa azaları olacaq. Saylavlarda olar yarımadanıñ çeşit regionlarında özleri keçti ve ğalip çıqqan soñ firqağa kirmege qarar aldı, çünki «Yedinaya Rossiyağa» işana ve yalıñız akimiyet firqasınıñ bir parçası degil, qırımlılar işanğan firqanıñ parçası olmağa istey», – dep bildirdi Balbek.

Qayd etmeli ki, yañı saylanğan deputatlarnen keçirilgen bütün toplaşuvlarda Balbekniñ yanında Albert Kangiyev buluna. Oña yaqın menbadan bilem ki, Kangiyevge yüksek siyasiy vazife endi vade etildi. Balbek onı Qırımnıñ Rusiye parlamentiniñ reisi vazifesine qoyacaq edi, amma olmadı. Şu sebepten Kangiyevniñ alacaq vazifesi meraqlı ola. Tezden ögrenirmiz.

Amma, belli ki, er bir areketniñ qarşı areketi ola. Qırımtatar milliy areketinde itibarlı olğan kişi (adını telükesizlik maqsadınen aytmaycam) qırımtatar milliy areketiniñ faalleri qırımtatarlarnıñ Qırımda Rusiye saylav kampaniyasında iştirak etüvi boyunca monitoring keçire, dep bildirdi.

Bu insanlar Ukraina resurslarından faydalanıp, Rusiyege nisbeten vatanperverlik islerini köstermemeli


«Qırımtatarlarnıñ belli bir qısmı, az olsa da, saylavlarğa namzet olaraq bardı ve deputat oldı. Bir çoq saylav bölgesinde qırımtatar milliy areketiniñ faalleri bar edi, olar saylavlarğa kelogen qırımtatarlarnı taqip etken edi. Bu iş yapıla ve soñuna qadar yapılacaq. Deputat namzetlerinen bağlı malümatnı alacaq insanlar endi çalışa, deputat oldımı-yoqmı müim degil, saylav esnasına yardım etken Rusiye tarafdarı qırımtatar faallerinen bağlı malümat da toplanacaq, olarnıñ esas Ukraina ile bağları qayd etilecek. Bu insanlar Ukraina resurslarından faydalanıp, Rusiyege nisbeten vatanperverlik islerini köstermemeli», – dedi menba.

Onıñ qayd etkenine köre, qırımtatar milliy areketiniñ faaller gruppası Meclis, QMC prokuraturası, Ukraina aq qorçalayıcı teşkilâtlarınen sıqı işbirligi yapa.

«Rusiye vatanperveri olğan insanlarnıñ Ukraina ile iç bir bağı qalmasın dep, elimizden kelgenini yapacaqmız», – dep qayd etti menba.

Onıñ aytqanına köre, bu, ne yazıq ki, devam etken Qırım ilhaqı sebebinden qırımtatarlar arasında satqınlar sayısınıñ artuvına qarşı iş parçası olacaq.

Mandat alğan bu qırımtatarlar deputat statusınen beraber qırımtatar halqı qabul etmegen satqın statusını da aldı


Mandat alğan bu qırımtatarlar deputat statusınen beraber qırımtatar halqı qabul etmegen satqın statusını da aldı. Olar yabancılarğa yaqın, yaqınlarına yabancı oldı, çünki qırımtatarlar hainlikni afu etmey.

Qırımnıñ Rusiye akimiyetine yaqın oldılarmı? Emin degilim. Çünki Remzi İlyasov, Zaur Smirnov da böyle tüşüngen ediler, amma vazifeleri bitken soñ olarnı da yollağanlar…

Malümat: Qırımda 2019 senesi sentâbrniñ 8-nde Qırım parlamenti ve yerli şura deputatlarınıñ Rusiye saylavları olıp keçti. Ukraina, ABD, AV ve bir sıra memleket Rusiyeniñ ilhaq etilgen yarımadada keçirgen saylavlarını qanunsız dep sayalar.

Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)

«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün

XS
SM
MD
LG