Qırımda aprelniñ 15-nde koronavirus sebebinden ilân etilgen özüni izolâtsiya etüv rejimi vaqtında soqaqqa sebepsiz çıqqan insanlarğa qarşı 208 memuriy protokol tizildi, dep bildirdi Qırımdaki Rusiye politsiyasınıñ yolbaşçı muavini Aleksandr Smaglin aprelniñ 16-nda operativ ştab toplaşuvında.
Onıñ qayd etkenine köre, «balalar özleri kezmege devam ete», ana-babalarına qarşı 9 protokol tizildi. Aqşam üstü soqaqta olğan gençler aqqında aytıla.
Politsiya malümatına köre, Yaltada «eñ uzaq» bankomatqa maşinanen ketken er adamğa qarşı protokol tizildi.
Kezlevde turaqta tanışlarınen turğan ve yanında vesiqaları olmağan er adamğa para cezası berildi.
Aprelniñ 16-nda saba Qırımnıñ Aqmescit ve Aqşeyh rayonlarında üç yañı koronavirus hastası qayd etildi. Aqyarda sekiz koronavirus hastası qayd etildi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Qırımnıñ Rusiye parlamenti yarımadada memuriy cinayetler qanunınıñ tüzetüvlerini qabul etti. Deputatlar Qırımda özüni izolâtsiya etüv rejimini bozğanlar içün para cezalarını sertleştirdi. Bu tedbirler aprelniñ 15-nden itibaren devam ete.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
