Link açıqlığı

Saatnıñ esas haberi

Qırımnıñ Rusiye parlamenti izolâtsiya rejiminiñ bozuluvı içün para cezalarını sertleştirdi


Qırımnıñ Rusiye parlamenti yarımadada memuriy cinayetler qanunınıñ tüzetüvlerini soñki oquvda qabul etti.

Deputatlar, Qırımda özüni izolâtsiya etüv rejiminiñ bozuluvı içün para cezalarını sertleştirdi.

Parlament saytında haber etilgenine köre, qanun leyhasınıñ tüzetüvleri uzaqtan rey berüv rejiminde qabul etildi. Para cezalarını sertleştirüv teşebbüsine 59 deputat qol tuttı, daa üçü qarşı çıqtı.

Qabul etilgen qanunğa köre, memurlar 30 biñden 40 biñ rublege qadar (10,8 – 15,5 biñ ğrıvnâ) para cezasını; şirketler – 200 biñden 300 biñ rublege qadar (72,6 – 108,9 ğrıvnâ) para cezasını alacaq.

Adiy vatandaşlar 4 biñ ruble (1,4 biñ ğrıvnâ) miqdarında para cezasını alacaq.

Memuriy cinayet tekrar yapılsa, memur 40 biñden 50 biñ rublege qadar (15,5 – 18,1 biñ ğrıvnâ); şirket 300 biñden 500 biñ rublege qadar (108,9 – 181 biñ ğrıvnâ) para cezasını alacaq.

Adiy vatandaş tekrar memuriy cinayet yapsa, 5 biñ ruble (1,8 biñ ğrıvnâ) memuriy para cezasını alacaq.

Naqliyat qullanılğan memuriy cinayet içün 5 biñ ruble para cezası berilecek.

Aprelniñ 10-nda saba Qırımnıñ Rusiye yolbaşçısı Sergey Aksenov koronavirus telükesi sebebinden ilân etilgen izolâtsiya rejimini bozğan yolcu ve maşina aydavcılar içün para cezası qanunını qabul etmege çağırdı.

Aprelniñ 10-nda Qırımda daa eki koronavirus hastası qayd etildi. Qırımlılar Tailanddan qayttı, Keriçte yaşaylar. Umumen Qırımda 28 COVID-19 hastası qayd etildi.

Aqyarda altı insan hastalandı, yördü tüzelip yahşı oldı.

Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG