Qırımnıñ Aqmescit ve Aqşeyh rayonında üç yañı koronavirus hastası qayd etildi. Bu aqta aprelniñ 16-nda Qırımnıñ Rusiye yolbaşçısı Sergey Aksenov bildirdi.
«Daa evel tasdıqlanğan hastalarnen yaqından alâqada oldılar. Bağda olğan tuvğanları ve tibbiyet hadimleri qayd etildi, olar tibbiy közetüv altında buluna», – dedi o.
Aksenovnıñ bildirgenine köre, eki hasta Aqşeyh rayonında yaşağan bir qorantanıñ azaları ola, daa bir hasta Aqmescitte bar – Moskvadan kelgen babası qızını yuqturdı.
Böylece, al-azırda Qırımda 37 koronavirus hastası qayd etildi, 24-ü ketirildi, 13 hasta yerli ola. 15 kişi tüzelip yahşı oldı, daa 14 kişi tedaviylene.
Aqyarda sekiz koronavirus hastası qayd etildi.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
