Aqyarda aprelniñ 16-na qadar dört yañı koronavirus hastası qayd etildi. Bu aqta şeerniñ sağlıq departamenti Facebookta haber ete.
«Aprelniñ 16-nda saba COVID-19 diagnozı tasdıqlanğan 8 insan yuqunç hastahanesinde buluna, kerekli tibbiy yardım alalar. Yılnıñ başından berli Aqyarda 12 hasta qayd etildi, dört kişi tüzelgen soñ hastahaneden çıqarıldı», – dep aytıla haberde.
Müessise malümatına köre, yuqunç hastahanesinde 70 insan közetüv altında buluna. 1369 kişi yaşağan yerinde közetüv altında buluna.
«Üç hasta (yañı – QA) – o birisi kün yuqunç hastahanesine ketirilgen qadınnen alâqada olğanlar. Qızı ve eki oğlançığınıñ diagnozı tasdıqlandı. Eñ yaqın vaqıtta ömür arqadaşınıñ ve, büyük ihtimalnen, bu yuqunçnı ketirgen soyunıñ diagnozını bilecekmiz», – dep bildire Aqyarnıñ Rusiye yolbaşçısı vazifelerini eda etken Mihail Razvojayevniñ aytqanlarını «RİA Novosti-Krım» agentligi.
Kütleviy haber vastalarınıñ malümatına köre, daa bir hasta Aqyarğa avtostopnen kele bilgen turist ola. O, Fiolentteki Svâto-Georgiyevskiy manastırını ziyaret etken seyaatçıdır.
Aprelniñ 16-nda saba Qırımnıñ Aqmescit ve Aqşeyh rayonlarında üç yañı koronavirus hastası qayd etildi. Qırımda 37 koronavirus hastası bar.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
